Ձեր վստահելի աղբյուրը

«Ժամանակ Երևան» թերթի գլխավոր խմբագիր Արման Բաբաջանյանի փաստաբաններն այսօր կրկին առիթ ունեին հանդիպելու լրագրողներին: «Վճռաբեկ դատարանը վերադարձրել է պաշտպանների վճռաբեկ բողոքը և գերադասել առհասարակ չքննարկել այս հարցը, ընդ որում` վերադարձրել է օրենքի կոպիտ խախտումներով»,- ասում է փաստաբան Հայկ Ալումյանը: Փաստաբանը հիշեցրեց, որ իրենք վճռաբեկ բողոք ներկայացրել էին դեռ հունվարի 22-ին: Օրենքով այս դատարանը 10-ը օրվա ընթացքում պարտավոր էր որոշում կայացներ` գործը վարույթ ընդունել- չընդունելու մասին, սակայն ընդհուպ մինչև մարտի յոթը, որևէ որոշում դատարանը կայացրած չի եղել:

Հայկ Ալումյանն ու Զարուհի Փոստանջյանն պնդում էին, որ եթե ոչ ամեն օր, ապա գոնե շաբաթվա մեջ 2-3 անգամ զանգահարել ու հետաքրքրվել են իրենց ներկայացրած բողոքով: Վերջին անգամ Զարուհի Փոստանջյանին մարտի 6-ին Վճռաբեկ դատարանից պատասխանել են, որ որոշում դեռ չկա: Սրանից հետք միայն փաստաբանները գրավոր դիմել են ՀՀ վճռաբեկ դատարանի նախագահին` նշելով, որ խախտվում են օրենքով սահմանված ժամկետները և առաջարկել են շտապ լուծում տալ խնդրին: Ըստ Արման Բաբաջանյանի պաշտպանների, մարտի 10-ին Վճռաբեկ դատարանից ստացել են նամակ, որի կնիքից երևում է, որ նամակը դատարանից դուրս է եկել մարտի 7-ին, իսկ ահա որոշումը, որով մերժվել է Ա.Բաբաջանյանի գործը Վճռաբեկ դատարանի վարույթ ընդունելը` թվագրված է փետրվարի 26 –ով:

Այս հանգամանքը փաստաբաններին հիմք է տալիս պնդելու, որ Վճռաբեկ դատարանի որոշումը գրված է հետին թվով: Սա մեկ, ասում է Հայկ Ալումյանը, իսկ հաջորդն այն է, որ դատարանի մերժման որոշումն իր մեջ որևէ պատճառաբանություն չի պարունակում:Փաստաբանները չեն փորձում Վճռաբեկի այս որոշման մեջ տրամաբանություն փնտրել.«տրամաբանություն բառն այս դեպքերի համար չի: Օրենքը խախտել են բացահայտ առանց թաքցնելու», ասում է Հայկ Ալումյանը:

ՀՀ վճռաբեկ դատարանից տեղեկացանք, որ բողոքը վերադարձնելու մասին որոշումն, իսկապես կայացվել է փետրվարի 26-ին: Ինչ վերաբերում է ժամկետներին, ապա դրանք, ըստ նրանց չեն խախտվել, քանի որ տասնօրյա ժամկետը հաշվվում է ոչ թե բողոքը գրասենյակ մուտք անելուց, այլ այն պահից, երբ բողոքը մակագրվում է պալատի դատավորներից որևէ մեկի վրա: Խախտված չեն նաև բողոքի մերժման մասին փաստաբաններին տեղեկացնելու ողջամիտ ժամկետները, ասում են ՀՀ Վճռաբեկ դատարանից: Նաև տեղեկացնում, որ բողոքի վերաբերյալ ինֆորմացիա տալու իրավունք, բացի դատավորից, որևէ այլ անձ չունի, իսկ տվյալ դեպքում փաստաբան Զարուհի Փոստանջյանը դիմել է մամուլի քարտուղարին, վերջինս էլ բոլոր իրեն ուղղված հեռախոսազանգերին պատասխանել է, որ ինքը տեղեկացված չէ:

Հիշեցնենք, որ Արման Բաբաջանյանին առաջին ատյանի դատարանը մեղավոր էր ճանաչել փաստաթղթեր կեղծելու միջոցով զինվորական ծառայությունից խուսափելու համար և դատապարտել 4 տարվա ազատազրկման: Իսկ Վերաքննիչ դատարանը 4-ը տարվա ազատազրկումը փոխարինեց 3,5- ով: Այսպիսով, ըստ ամենայնի, Արման Բաբաջանյանին սպառնում է 3,5- ազատազրկում: Ինչ վերաբերում է պայմանական վաղաժամկետ ազատմանը, փաստաբան Հայկ Ալումյանն ասում է. «պայմանական վաղաժամկետ ազատումը ևս դարձել է Էկզոտիկ գործընթաց. ստեղծել են մի հանձնաժողով, որը որոշում է թույլ տալ՞ մարդուն օգտվել իր իրավունքից, թե` ոչ»:

Փաստաբանները պատրաստվում են դիմել ՍԴ և Եվրոպական դատարան: Ի դեպ, ինչպես տեղեկացանք ԱՄՆ-ից «Ժամանակ Երևան» թերթին հասցեագրված նամակներից մեկից ԱՄՆ պետդեպարտամենտի «Ազատ խոսքի և մարդու իրավունքների պաշտպանության 2006 թվականի» զեկույցում Արման Բաբաջանյանի անունը հիշատակվել է որպես քաղբանտարկյալ: