Ձեր վստահելի աղբյուրը

Վանաձորում այսուհետ կգործի նորակառույց քրեակատարողական հիմնարկ: Նախագիծն անցել է փորձաքննություն և շինարարության ներկայացվել 2005 թվականին: Շինարարական աշխատանքների ընդհանուր արժեքը կազմել է 1. 254. 505. 300 դրամ: «Կալանավորված և դատապարտված անձանց պահման պայմանները «Վանաձոր» քկհ-ում առավելագույնս մոտեցված են եվրոպական չափանիշներին»,- ասում է ՀՀ Արդարադատության նախարարության քրեակատարողական հիմնարկների վարչության պետ Աշոտ Մարտիրոսյանը: Ըստ նրա, «Վանաձոր» քկհ նորակառույց շենքն այսօրվա դրությամբ լավագույնն է ՀՀ քրեակատարողական համակարգում:

Քառահարկ շենքը զբաղեցնում է մոտ 5.000 քմ տարածք և նախատեսված է հին շենքից կրկնակի ավելի` 240 դատապարտյալ և կալանավոր անձանց պահելու համար: Յուրաքանչյուրին հատկացվելու է 4 և ավելի քմ տարածք: Բոլոր խցերը կահավորված են, ունեն փայտեպատ հատակ: Խցերի ներսում կոմունալ հարմարություններն առանձնացված են բնակելի տարածքից: Լուսավորությունը բավարար է, էլեկտրական անջատիչները եվրոպական չափանիշների համաձայն տեղադրված են խցերի ներսի և դրսի կողմերից: Ի դեպ, հիմնարկում գործելու է առևտրի կրպակ, տեխնիկապես հագեցված լվացքատուն, բուժմաս, ջեռուցման կենտրոնացված համակարգ և հարմարավետ մարզահրապարակ:

Այսօր պաշտոնական այցով նորակառույց քրեակատարողական հիմնարկում էր ՀՀ արդարադատության նախարար Դավիթ Հարությունյանը:Նախարարն ամենայն ուշադրությամբ բոլոր հարկերում, խցերում շրջելուց հետո, պատասխանելով լրագրողների հարցերին` կարևորեց դատապարտյալ և կալանավորված անձանց պահելու պայմանների բարելավումն ու դրանց` եվրոպական ընդունված չափանիշներին համապատասխանեցնելը, շեշտեց, որ պատիժն ազատազրկումն է, այլ ոչ` վատ կենցաղային պայմանները: Նախարարն ասում է, որ դատաիրավական բարեփոխումները ոչ միայն սկսված և հաստատուն ընթացքի մեջ են, այլ նաև դրանց ռազմավարությունը նախանշված է առաջիկա մի քանի տարվա համար:

Կրկին անդրադառնալով նորակառույց հիմնարկին, նշենք, որ սա հնագույն կալանավայրերից էր, կառուցված` 19-րդ դարում: Սկզբնական շրջանում շենքն օգտագործվել է զուտ տնտեսական նպատակներով (որպես ախոռ): Վերակառուցումներից և վերանորոգումներից հետո, որպես ՔՀ հիմնադրվել է 1961 թվականին, հիմնականում ծառայել է որպես քննչական մեկուսարան: Նախատեսված էր թվով 128 կալանավորված և դատապարտված անձանց համար: Ջրառատ տեղայնքում գտնվող այս կառույցը բազմիցս է վերանորոգվել, սակայն գրունտային ջրերի ազդեցությունից շինությունների պատերը, որոնք հիմնականում կառուցված են ավազակրային շաղախով, քայքայվել էին: 1988թ. երկրաշարժի ժամանակ շինությունները ճանաչվել էր վթարային:

«Խոնավությունը խցերում գերազանցում էր ընդունված չափանիշները և տեղ-տեղ հասնում էր 80 աստիճանի: Բարձր խոնավության պատճառով շենքի առաջին հարկը գրեթե չէր օգտագործվում և ազատազրկված անձինք պահվում էին միայն երկրորդ հարկի խցերում: Այդ խցերում լուսավորության աստիճանը բավարար չէր: Ջեռուցման համակարգը չէր գործում, և խցերը տաքացվում էին ինքնաշեն էլեկտրական սալիկների միջոցով»,- պատմում է «Վանաձոր» քկհ պետ Շավարշ Ալչանգյանը:

Թույլ լուսավորվածությունն ու օդի ցածր ջերմաստիճանը բացասաբար էին անդրադառնում մարդկանց առողջական վիճակի վրա: Բացի այդ, շենքն ընդհանուր առմամբ գերբնակեցված էր: Խցերում 2-ից 8 հոգի էին պահվում: Թեև վերջին շրջանում մահճակալների ապամոնտաժման ճանապարհով որոշ չափով ընդլայնվել էր 1 անձին տրամադրվող բնակելի տարածքը, սակայն 4 քմ պահանջը չէր ապահովվում: Այն նորոգման ենթակա չէր:

Շենքային պայմանների բարելավմանը զուգահեռ հիմնարկում առաջացել է նաև աշխատանքային թափուր տեղերի խնդիր, հատկապես այս մասին ոլորտի ներկայացուցիչները լրատվամիջոցներն խնդրեցին բարձրաձայնել: Հիմնարկի ղեկավարության փոխանցմամբ աշխատավարձը` սկսած յոթանասուն հազար դրամից: