Ձեր վստահելի աղբյուրը

ԵԱՀԿ գրասենյակի աջակցությամբ երեկ Երևանում բացվեց «Հանրային հակակոռուպցիոն ընդունարան»: Այստեղ քաղաքացիները կարող են հնարավոր կոռուպցիոն դեպքերի վերաբերյալ ստանալ իրավական, ընթացակարգային և գործնական խորհրդատվություն: Ընդունարանում աշխատելու են Հակակոռուպցիոն կոալիցիայի մեջ ներգրավված 14 հասարակական կազմակերպությունների փորձագետները, ովքեր ակտիվ դերակատարություն են ունեցել նաև կառավարության ընդունած Հակակոռուպցիոն ռազմավարության ծրագրի իրականացման և մոնիտորինգի ժամանակ: Այս կազմակերպությունների` 2006 թվականից ի վեր իրականացրած փորձնական ծրագրերի շրջանակներում գրանցված ձեռքբերումների հիման վրա էլ հենց հիմնվել է ընդունարանը:
Կենտրոնի բացմանը, բացի ԵԱՀԿ Երևանյան գրասենյակի ղեկավար, դեսպան Վլադիմիր Պրյախինից և մի շարք հասարակական կազմակերպությունների ներկայացուցիչներից, ներկա էր նաև Հայաստանի նախագահ Ռոբերտ Քոչարյանի օգնական, հակակոռուպցիոն խորհրդի մոնիտորինգի հանձնաժողովի նախագահ Գևորգ Մհերյանը:

Պետական, միջազգային ու հասարակական կառույցների ներկայությունը Վլադիմիր Պրյախինին հիմք տվեց եզրակացնելու, որ կոռուպցիայի դեմ պայքարում այս կառույցների տեսակետները լիովին համընկնում են: «Ընդունարանը քաղաքացիական հասարակության, իշխանությունների և ԵԱՀԿ միջև համագործակցության լավ օրինակ է»,- իր բացման խոսքում նշեց նա:

«Զինվորի մայր» հասարակական կազմակերպության նախագահ Գրետա Միրզոյանն էլ ավելացրեց. «Հանրային ընդունարանը փորձված ինստիտուտ է շատ երկրներում, և ուրախ ենք այն Հայաստանում տեսնելու համար»: Գրետա Միրզոյանի խոսքերով, կոռուպցիայի դեմ պայքարի քաղաքականության մեջ պետությունն արդյունավետ կերպով օգտագործում է «մեկ պատուհանի» սկզբունքը: Այս իմաստով նա ընդունարանի բացումը համահունչ համարեց պետական մոտեցմանը, քանի որ «…ընդունարանը քաղաքացիներին հնարավորություն է տալիս մեկ պատուհանից սպառիչ պատասխաններ ստանալ իրենց հուզող հարցերի վերաբերյալ»:

Ընդունարանի բացման առիթն օգտագործվեց հանրապետությունում կոռուպցիայի հետ կապված իրավիճակին անդրադառնալու համար: Թե դեսպան Պրյախինը, թե Գևորգ Մհերյանը հանձն չառան գնահատական տալու վերջին տարիներին Հայաստանում կոռուպցիայի վերացման դինամիկային: Նրանց վստահեցմամբ, կոռուպցիայի մակարդակը չափելու քանակական ցուցանիշներ չկան, ինչը դժվարացնում է իրավիճակը գնահատելու փորձը: Իսկ ահա «Հայաստանի վաճառականների միության» նախագահ Ցոլվարդ Գևորգյանը փաստեց, որ հայ չինովնիկներն օգտվում են գործարարի` օրենքի չիմացության փաստից: Ըստ տիկին Ցոլվարդի, իրենց կազմակերպությունը դատարանում աջակցել է 54 գործարարների և 54 գործերն էլ շահել է:

Ինչ վերաբերում է 2003 թվականից գործողության մեջ գտնվող հակակոռուպցիոն ռազմավարության ծրագրի արդյունքներին, ապա Գևորգ Մհերյանի խոսքերով, դրանք արդեն շոշափելի են: Այս առումով ամենացայտուն փաստը ճանապարհային ոստիկանության բարեփոխումն է: Ի դեպ, Գևորգ Մհերյանի տեղեկացմամբ, այս ծրագիրն արդեն 2007 թվականի օգոստոսին ավարտվելու է, և այսօր արդեն ոլորտի պատասխանատուները վստահեցնում են, որ ձեռնամուխ են եղել Հակակոռուպցիոն նոր ծրագրի մշակման աշխատանքներին:

Տեղեկացնենք Հայաստանի քաղաքացիները Հանրային ընդունարանին կարող են դիմել նաև [email protected] էլեկտրոնային փոստի հասցեով, ինչպես նաև` 53-16-88 թեժ հեռախոսագծով: ԵԱՀԿ Երևանյան գրասենյակը տեղեկացնում է նաև, որ մայիս ամսին նմանատիպ ընդունարաններ կբացվեն Լոռիում և Գեղարքունիքում: