Ձեր վստահելի աղբյուրը

Օտարման գործընթաց ասելով, մարդկանց մոտ, մի անգամից առաջանում է դժգոհության ու բողոքի զգացում, պատկերացնում են անտուն ու վտարված մարդկանց: «Վերջապես այս ոլորտում հայտնվել է մի ընկերություն, որն առաջնորդվում է բարոյականության սկզբունքով»,- այսպիսի կարծիք վերջերս հայտնեցին, ժողովրդի խոսքով ասած, «Ֆիրդուսի» փողոցի բնակիչները: Այդ տարածքը կառուցապատող «Սիթի սենթր դիվելըփմենթ» ընկերությունը շարունակում է պայմանագրեր կնքել թաղամասի բնակիչների հետ: «Ֆիրդուսի» տարածքի բնակիչներին ընկերության կողմից առաջարկվել է ոչ թե գումարային, այլ բնակարանային փոխհատուցում: «Սիթի սենթր դիվելըփմենթ» ընկերությունը բնակիչներին համապատասխան բնակարաններ է առաջարկել  Գինու գործարանի տարածքի հարևանությամբ կառուցվող բարձրահարկ շենքից: Շենքը շահագործման է հանձնվելու երկու տարի հետո, բայց կատարյալ վիճակում: Ներկայացնում ենք մեր հարցազրույցը «Սիթի Սենթր Դիվելըփմենթ» ՓԲԸ տնօրեն Էդուրադ Մելիքյանի հետ.

-Ոլորտում գործող ընկերությունները մինչև այժմ իրականացնում էին գումարային փոխհատուցում, ինչու՞ է Ձեր ընկերությունը ընտրել բնակարանային փոխհատուցման ճանապարհը
- Ժամանակը ցույց տվեց, որ բնակարանային փոխհատուցումն ավելի արդյունավետ է: Այս ընթացքում եղան դեպքեր, երբ դրամական փոխհատուցում ստանալով ընտանիքներում վեճեր առաջացավ: Օրենքի պահանջով, գումարը ստանում է սեփականատերը, ով պարտավոր է փոխհատուցել նաև օգտագործողներին, հենց այս գործընթացն էլ դառնում էր վեճերի առարկա: Այս ընթացքում ակնհայտ դարձավ, որ դրամական փոխհատուցումը ճիշտ չէ նաև մեկ այլ պատճառով. շատերը որոշեցին բնակարաններ ավելի ուշ ձեռք բերել և փոխհատուցված գումարները ծախսեցին, հետո էլ բնակարանների գներն աճեցին և այդպես էլ չկարողացան բնակարան ձեռք բերել:

-Պրն Մելիքյան, չնայած առաջարկվող շահեկան պայմաններին, «Ֆիրդուսի» բնակիչներն, այնուամենայնիվ, անհանգստացած են, քանի որ որոշ մարդկանց պատկանող տարածքները համապատասխան մարմիններում չեն սեփականաշնորհում և նրանք մտավախություն ունեն, որ փոխհատուցում չեն ստանա
-Մենք բազմիցս ասել ենք. անկախ նրանից տարածքը, տունը սեփականաշնորհված է, թե` ոչ , միևնույն է բոլոր բնակիչներն իրենց պատկանող յուրաքանչյուր 1քմ-ի դիմաց ստանալու են բնակարանային փոխհատուցում կրկին 1քմ: Այնպես որ, բնակչության մտավախություններն ավելորդ են, ավելին` այս ընթացքում սեփականացնելու դեպքում նրանք պարզապես լրացուցիչ ծախսեր կիրականացնեն:

- Ձեր ընկերության որդեգրած քաղաքականությամբ, կարծում եմ դժվար է աշխատել առանց կուրուստների, ինչպե՞ս է հաջողվում Ձեզ
-Իբրև նախադեպ` բնակարանային փոխհատուցման առումով, որոշ ընկերություններ ևս որդեգրել են նույն քաղաքականությունը, սակայն բոլորը չէ, որ կարող են այդպես աշխատել: Մեզ հաջողվում է, քանի որ կառուցվող շենքերի շինարար կազմակերպությունը «Գլենդել Հիլզ» կառուցապատող մեծ ընկերությունն է և պայմանագիրը կնքվում է եռակողմ` «Գլենդել Հիլզ», «Սիթի սենթր Դիվելըփմենթ» և բնակիչ: Այսինքն` ի հաշիվ նրա, որ «Գլենդել Հիլզ»-ը մեծ ընկերություն է: Փոքր ընկերությունների պարագայում գործընթացը, պարզապես անշահութաբեր կլիներ: Իսկ ընդհանրապես ես սա համարում են միակ ոչ կոնֆլիկտային տարբերակը:

-Որն՞ եք համարում բնակիչների համար ամենամեծ երաշխիքը, կնքած պայմանագրե՞րը
-Ոչ´, միայն պայմանագիրը չի կարող երաշխիք հանդիսանալ: Պատկերացրեք իրավիճակ, երբ առկա է կնքած պայմանագիր, բայց տվյալ ընկերությունը սնանկացել է: Ինչ է ստացվում. մարդն ունենում է պայմանագիր, իրավունք և սնանկ կազմակերպություն, իսկ տունը քանդած է: Դրա համար մեր որդեգրած քաղաքականության կարևորագույն մասն այն է, որ մարդիկ մնում են իրենց տներում, մինչև կտրամադրվի նոր տուն: Կոնկրետ «Ֆիրդուսի» բնակիչները նախընտրել են Գինու կոմբինատի հարևանությամբ կառուցվող բարձրահարկը: Մենք պատրաստ ենք բնակարան տրամադրել նաև նույն վայրում, բայց այդ պարագայում մենք պետք է ունենանք արդեն ազատված տարածք` նոր շենք կառուցելու համար: Այսինքն, մեր ընտրած տարբերակով գործարքի ռիսկայնությունը հավասարեցված է զրոյի:


-Ինչպես է հաջողվել այսքան քաղաքացիների հետ գործնական հարաբերությունների արդյունքում ունենալ, այդքան քիչ թվով բողոքներ: Որքանով տեղյակ եմ, այս ընթացքում ընդամենը 5 դատական գործ եք ունեցել
- Բոլորին առաջարկվել է համապատասխան փոխհատուցում: «Սիթի Սենթր Դիվելըփմենթ» ՓԲԸ-ն դեռևս մեծ ծրագրեր չի իրականացրել, սակայն «Գլենդել Հիլզ»-ը , որն ինչպես արդեն նշեցի նույն գործադիր մարմնին է պատկանում, իրացման աշխատանքների մեծ փորձ ունի: Ընկերությունն աշխատել է Բուզանդի փողոցի 73 ընտանիքների հետ, այնուհետև Գինու կոմբինատի հարևանությամբ 170 ընտանիքների հետ: Իսկ ինչ վերաբերվում է դատական վեճերին` 5-ից յուրաքանչյուրի դեպքում բնակարանային փոխահատուցման առաջարկ նույնպես ընկերության կողմից արվել է: Սակայն չի ընդունվել և միայն այդ ժամանակ է իրականացվել հարկադիր իրացում:

-Որ՞ն է քաղաքացիների հետ աշխատելու Ձեր սկզբունքը
- Անում ենք միայն այն, ինչը կարող ենք բարձրաձայնել: Ընկերության կողմից մշակված է մի քաղաքականություն, որը բացի փոխհատուցումից, տալիս է նաև այլ առավելություններ: Օրինակ` անկախ նրանից, թե ինչ վիճակում են գտնվում նրանց տները` լավ, թե վատ, մենք ապահովում ենք բնակարանային կատարյալ պայմաններ: Սա, փաստորեն, ոչ միայն փոխհատուցում է, այլև սոցիալական վիճակի բարելավում: Թաղամասում իրականացվող քաղաքաշինական ծրագիրը կառավարության կողմից ճանաչվել է գերակա հանրային շահ, այս պարագայում սեփականատերերը կամ օգտագործողները զրկվում են իրենց սեփականության իրավունքից, հետևաբար` իրենք պետք է ստանան ավելի շատ բարելավում, քան ունեին մինչ այդ: Այդ թաղամասի տներն ունեն մաշվածության բարձր տոկոս, առավելություններից մեկն էլ այն է, որ այժմ ձեռք են բերում նորակառույց և ավելի բարձր արժեքներով բնակարաններ: