Ձեր վստահելի աղբյուրը

Հայաստանի ֆուտբոլի բարձրագույն խմբի առաջնության 3-րդ տուրը խոստանում էր լինել հետաքրքիր իրադարձություններով լի, քանի որ պետք է հանդիպեին վերջին տարիների անհաշտ մրցակիցներ, ընթացիկ մրցաշրջանի գլխավոր ֆավորիտներից երկուսը` «Փյունիկն» ու «Միկան»: Այս տուրից առաջ երկու թիմերն էլ իրենց ակտիվում ունեին երկուական հաղթանակ և Ղափանի «Գանձասարի» հետ գլխավորում էին մրցաշարային աղյուսակը: Նախորդ տարիներին ներքին առաջնությունում հետևյալ պատկերն էր հաճախ կրկնվում. «Փյունիկն» առաջին խաղերում մեկը մյուսի ետևից հաղթանակներ էր տանում, ստեղծելով միավորների բավական լուրջ առավելություն, որը չեզոքացնել մրցակիցներին մինչև առաջնության ավարտ այդպես էլ չէր հաջողվում:

Բոլորին էլ պարզ է` «Փյունիկին» չի կարելի թողնել «պոկվել» հետապնդողներից, քանի որ հետագայում պայքարել չեմպիոնության համար շատ դժվար է լինելու: Դա հասկանում էին նաև «Միկայի» ֆուտբոլիստները: Սակայն միևնույն է, Արմեն Ադամյանը պահեստայինների նստարանին որոշեց թողնել միկացիների գլխավոր շարժիչ ուժին` Արմեն Շահգելդյանին, պատճառաբանելով, որ Շահգելդյանն այս մրցաշրջանում արդեն երկու դեղին քարտ է ստացել, իսկ երրորդը «Միկայի» համար կարող էր ճակատագրական դառնալ, քանզի, ընդամենը մի քանի օր հետո «Միկային» շատ բարդ հանդիպում էր սպասվում գավաթի խաղարկության շրջանակներում` «Բանանցի» հետ: Այդ իսկ պատճառով այդ օրը խաղադաշտ դուրս չեկավ նաև «Միկայի» պաշտպանության առաջատարներից մեկը` Արմեն Պետիկյանը, ով արտակարգ է սկսել ընթացիկ մրցաշրջանը: «Միկայի» մեկնարկային կազմում հայտնվեց միանգամից 7 լեգիոներ` 5 բրազիլացի և երկու ռուս: Իսկ չեմպիոնի կազմում կար մեկ կորուստ:

Բացակայում էր պաշտպան Վալերի Ալեքսանյանը: Վնասվածքի հետ կապված որոշակի դադարից հետո շարք է վերադարձել թիմի առանցքային կիսապաշտպաններից մեկը` Ռաֆայել Նազարյանը, ով հենց առաջին րոպեներից հայտնվեց խաղադաշտում:
Առաջին կեսում ավելի ակտիվ էին հյուրերը. «Միկայի» ֆուտբոլիստները, որոնք մի քանի անգամ լրջորեն սպառնացին «Փյունիկի» նորեկ Վլադիսլավ Խորկինի դարպասին, ով ի դեպ այս խաղում մի քանի անգամ «աչքի ընկավ» բավական անվստահ գործողություններով, ի հակառակ իր հայրենակից Ալեքսանդր Լապինի` «Միկայի» դարպասապահի: Լապինը շատ բարձր մակարդակի վրա անցկացրեց այս մրցավեճը և արժանացավ բարձր գնահատականի, թե մասնագետների և թե երկրպագուների կողմից: «Փյունիկի» կազմում առաջին կեսում առանձնանում էր Հայաստանի ազգային հավաքականի անդամ Հենրիկ Մխիթարյանը: Նա անընդհատ փորձում էր սրություն մտցնել իր թիմի գործողություններում, իսկ մրցակիցը հաճախակի ստիպված էր միայն կանոնների խախտման գնով կանգնեցնել Մխիթարյանի առաջընթացը: Դրվագներից մեկում նրա սուր փոխանցումից հետո Տիգրան Ղարաբաղցյանը մնալով Լապինի հետ մենակ չկարողացավ շրջանցել դարպասապահին: Սա «Փյունիկի» ամենառեալ գոլային պահն էր առաջին խաղակեսում:

Երկրորդ կեսում փյունիկցիներն ակտիվացան: Դրվագներից մեկում Ռաֆայել Նազարյանը պարզապես պարտավոր էր գրավել մրցակցի դարպասը, բայց նրա մոտ տարածությունից հարվածից հետո, Լապինն աներևակայելի ցատկով կարողացավ ետ մղել սպառնալիքը: Ընթանում էր հանդիպման 90-րդ րոպեն: Թվում էր խաղն այդպես էլ կավարտվի, բայց փոխարինման դուրս եկած Գևորգ Ղազարյանը, մրցակցի կիսադաշտում շրջանցելով «Միկայի» մի քանի ֆուտբոլիստի, փոխանցում կատարեց աջ եզր, և Լևոն Պաչաջյանը դիպուկ հարվածով գնդակն ուղարկեց Լապինի դարպասի հեռավոր անկյունը: Դարպասապահն այդ դրվագում ոչ մի շանս չուներ: «Փյունիկն» հաղթեց, մի գուցե և սա այս հանդիպման տրամաբանական ավարտը չէր: Ինչևէ, Հայաստանի բազմակի չեմպիոնը վաստակեց շատ կարևոր երեք միավոր և այժմ միանձնյա գլխավորում է մրցաշարային այուսակը:

Երրորդ տուրի մյուս մրցավեճերում գրանցվեցին հետևյալ արդյունքները: «Բանանցը» սեփական հարկի տակ երկու անպատասխան գնդակ ուղարկեց «Ուլիսի» դարպասը: Այս խաղում աչքի ընկան «Բանանցի» նորեկ, ռուս հարձակվող Ռոման Բուտենկոն, և Հայաստանի ազգային ընտրանու կիսապաշտպան Սամվել Մելքոնյանը: «Կիլիկիան» «Հրազդան» մարզադաշտում կարողացավ անառիկ պահել սեփական դարպասը «Գանձասարի» հետ մրցավեճում և շատ կարևոր միավոր վաստակեց: Իսկ Գյումրիում «Արարատը» առաջնության գլխավոր ռմբարկու բրազիլացի Մարկոսի շնորհիվ նվազագույն հաշվով առավելության հասավ «Շիրակի» նկատմամբ:

Մրցաշարային աղյուսակ
Խ Հ Ո Պ Գ Մ

«Փյունիկ»          3 3 0 0 8-1 9
«Գանձասար»   3 2 1 0 3-0 7
«Միկա»             3 2 0 1 5-3 6
«Արարատ»       3 2 0 1 6-1 6
«Բանանց»        3 1 1 1 3-2 4
«Շիրակ»           3 0 1 2 1-4 1
«Կիլիկիա»       3 0 1 2 1-7 1
«Ուլիս»             3 0 0 3 0-9 0

Ռմբարկուներ`
Մարկոս (Արարատ) - 4
Կլեբեր Լուիս (Միկա) - 3