Ձեր վստահելի աղբյուրը

«Նշանակված է ծառայողական քննություն, Երևան քաղաքի դատախազությունում հարուցված է քրեական գործ, իսկ ոստիկանության ղեկավարությունը շահագրգռված է, որ բացահայտվեն մահվան բոլոր հանգամանքները»,- այսօր անդրադառնալով մայիսի 12-ին ոստիկանության քրեական հետախուզության գլխավոր վարչություն հրավիրված «Պանդոկ» ռեստորանի տնօրեն Լևոն Ղուլյանի մահվան դեպքին, ասաց ՀՀ ոստիկանության պետի մամուլի քարտուղար, հասարակայնության հետ կապի և լրատվության վարչության պետ Սայաթ Շիրինյանը:

Հիշեցնենք, որ ոստիկանության քրեական հետախուզության գլխավոր վարչություն աշխատասենյակներից մեկում հարցազրույցի ընթացքում, ըստ ոստիկանության, Լ. Ղուլյանը վարչության աշխատակցից ջուր է խնդրել և փորձել պատուհանից դիմել փախուստի, սակայն սայթաքելով վայր է ընկել և ստացած վնասվածքներից` տեղում մահացել: Մահացածի հարազատներն այս ձևակերպման հետ համաձայն չեն և պնդում են, որ Ղուլյանին ծեծի են ենթարկել, մարմնի վրա բազում կապտուկներ ու կոտրվածքներ են հայտնաբերվել:

Լուրեր են պտտվում, որ Լ. Ղուլյանը քրեական հետախուզության գլխավոր վարչության շենքի պատուհանից ոչ թե փախուստի է դիմել, այլ նրան գցել են : Այստեղ շոշափվում է նաև քրեական հետախուզության գլխավոր վարչություն պետի տեղակալ Հովհաննես Թամամյանի անունը: Այս և այլ հարցերին ի պատասխան ՀՀ ոստիկանության հասարակայնության հետ կապի և լրատվության վարչության պետը հորդորեց սպասել նախաքննության ավարտին. «կպարզվի, որ Հովիկ Թամամյանը կապ ունի բոլորս միասին կպախարակենք, բայց այժմ ձեռնպահ մնանք»,- ասաց Սայաթ Շիրինյանը` վստահություն հայտնելով, որ Երևան քաղաքի դատախազությունը բազմակողմանի, օբյեկտիվ և լրիվությամբ նախաքննությունը կավարտի ու իրավական գնահատական կտա:

Սայաթ Շիրինյանը փորձելով չբացահայտել նախաքննության գաղտնիքներն, այնուամենայնիվ, ասաց, թե Ղուլյանը միանգամից չի ընկել, նախ` ընկել է երկրորդ հարկի տանիքանման հարթակ, որտեղ երկաթե խողովակներ են եղել: Իսկ այս հարցի պատասխանը, ըստ նրա, կտա նշանակված փորձաքննությունը:

Թեև երեկ ոստիկանապետ Հայկ Հարությունյանը մահացածի հարազատներին ընդունելու ժամանակ չի ունեցել, փոխարենը նրանց հետ հանդիպել է ոստիկանապետի տեղեկալ Արարատ Մահտեսյանը, այնուամենայնիվ, այսօր ոստիկանության ներկայացուցիչն ասաց, որ գործը ոստիկանապետի անմիջական հսկողության տակ է և մեղավորը կպատժվի, անկախ նրանից, թե ով է, եթե նույնիսկ բարձրաստիճան պաշտոնյա է:

Հիշեցնենք նաև, որ Ղուլյանը բերման ենթարկվածի, ձերբակալվածի և կալանավորվածի կարգավիճակ չի ունեցել, նա եղել է ընդամենը հրավիրված: