Ձեր վստահելի աղբյուրը

ՀԿ-ների հակակոռուպցիոն կոալիցիային և ԵԱՀԿ երևանյան գրասենյակի 2004-ից սկիզբ առած համագործակցության արդյունքում օրերս ևս մեկ հակակոռուպցիոն հանրային ընդունարան բացվեց Ստեփանավանում: Ընդունարանի բացմանը մասնակցեցին ԵԱՀԿ երևանյան գրասենյակի ղեկավար Վլադիմիր Պրյախինը, Ստեփանավանի քաղաքապետ Սարգիս Ղարաքեշիշյանը և «Զինվորի Մայր» ՀԿ-ի նախագահ Գրետա Միրզոյանը: Ընդունարանը կգործի «Զինվորի Մայր» ՀԿ-ի Ստեփանավանի գրասենյակում` «Մխիթար Գոշ» համալսարանի շենքում:

Նշենք, որ համագործակցության շրջանակներում հնարավոր կոռուպցիոն ռիսկերի նվազեցման և քաղաքացիների իրազեկման նպատակով նախորդ տարի Երևանում, ինչպես նաև Լոռու և Գեղարքունիքի մարզերում գործել են մի քանի հանրային ընդունարաններ: Այս տարվա ապրիլից Երևանում գործում է հակակոռուպցիոն հանրային ընդունարան: Ընդունարաններում փորձառու իրավաբաները և փորձագետները քաղաքացիներին տրամադրում են իրավական, ընթացակարգային և գործնական խորհրդատվություն և տարբեր ոլորտներում փորձագիտական աջակցություն:

«ԵԱՀԿ-ն կարևորում է քաղաքացիների և քաղաքացիական հասարակության իրավական իրազեկվածության բարձրացումը` որպես կոռուպցիայի դեմ պայքարելու միջոց»,-նշեց Վ. Պրյախինը: Նրա խոսքով, նման նախաձեռնությունը այստեղ ընդունվել է ոչ միայն ՀԿ-ների, այլև տեղական իշխանությունների կողմից: «Դա վկայում է տեղական իշխանության մարմինների և հասարակության միջև այս տարածաշրջանում ստեղծված կայուն համագործակցության մասին», - ասաց նա: Գ. Միրզոյանը հավաստիացրեց, որ ՀԿ-ների հակակոռուպցիոն կոալիցիայի և ընդունարանների ակտիվ աշխատանքը մեծ դեր կունենա կոռուպցիայի դեմ պայքարի գործում:

Հանդիպման ընթացքում Ստեփանավանի բնակիչները ներկայացրեցին իրենց հուզող խնդիրները: Դրանք մեծ մասամբ վերաբերում էին բնակարանային պայմաններին, սոցիալական վիճակին և զորակոչին: Քաղաքապետի մասնակցությամբ տեղի ունեցավ այդ խնդիրների և դրանց կարգավորման տարբերակների քննարկում: Ընդունարանի աշխատանքների համակարգող Սիլվա Մարտիրոսյանը նշեց, որ արդեն իսկ ստացել են տարբեր ոլորտներին առնչվող բազմաթիվ դիմումներ: