Ձեր վստահելի աղբյուրը

«Երկքաղաքացիության արգելքը Սահմանադրությունից հանելու առաջամարտիկը եղել ենք մենք»: Այսօր «Տեսակետ» ակումբում լրագրողների հարցին ի պատասխան, հայտարարեց ԱԻՄ նախագահ Պարույր ՀԱՅՐԻԿՅԱՆԸ: Նա նաև հավելեց, որ, «մարդուն` իր բնակության վայրից կախված ընտրելու հնարավորությունից զրկելը անհեթեթություն է: Քաղաքացիությունը չի ենթադրում մշտական բնակեցում երկրում կամ որոշակի բնակավայրում: Դա Սահմանադրության խախտում է և ժամանակի ընթացքում կուղղվի»: Նրա խոսքով, հիմա ոչ միայն սփյուռքահայերն են զրկված ընտրելու հնարավորությունից, այլև արտասահմանում գտնվող Հայաստանի քաղաքացիները, ինչը «ինչ որ առումով գուցե հեշտացնի երկքաղաքցիության կիրառումն ու նրանց ընտրելու հնարավորություն տալը»:

Նույն հարցի վերաբերյալ ԱԺ փոխնախագահ Վահան ՀՈՎՀԱՆՆԻՍՅԱՆԸ հիշեցրեց, որ դեռևս 1991թ. սեպտեմբերի 22-ի անկախության հանրաքվեից հետո Դաշնակցությունն առաջարկել է ստեղծվող հանրապետությունը 18-20թթ հանրապետության իրավահաջորդ հայտարարել, ինչը «ենթադրում էր բոլոր հայերին ճանաչել իրենց հայրերի քաղաքացիական իրավունքների ժառանգորդ»: Սակայն, դա չարվեց, քանի որ, ըստ Վ. Հովհաննիսյանի, «այն ժամանակվա իշխանությունները վախենում էին, որ նրանց ձայնի ու քվեի իրավունք տալով, քաղաքական բոլորովին այլ պատկեր կստեղծեր Հայաստանում: Վախենում էին, նաև, որ այդ մարդիկ կմասնակցեն այն վայրի, գազան սեփականաշնորհմանը և երևի ավելի նորմալ տեսք կունենար մեր տնտեսությունը»:

Հարցին, թե հնարավոր է մինչ 2008-ի նախագահական ընտրություններ այդ հարցը լուծված լինի, և սփյուռքահայերը կարողնանա քաղաքացիություն ստանալ ու մասնակցել ընտրություններին, ԱԺ փոխնախագահը դրական պատասխան տվեց, նշելով, որ դա հնարավոր էր իրականացնել անգամ մինչև խորհրդարանական ընտրությունները: