Ձեր վստահելի աղբյուրը

Հանրապետության տոնի կապակցությամբ նախագահ Ռոբերտ Քոչարյանի հրամանգրերով մեդալներով պարգևատրվել են մի շարք գործիչներ: «Երևաննախագիծ» ՓԲԸ տնօրեն, Երևանի ճարտարապետության և շինարարության պետական համալսարանի պրոֆեսոր Գուրգեն Մուշեղյանը պարգևատրվել է Անանիա Շիրակացու մեդալով: Հայրենիքին մատուցած ծառայությունների համար 2-րդ աստիճանի մեդալով պարգևատրվել են նախագահի գլխավոր ռազմական տեսչության տեսուչներ, գնդապետներ Ներսես Եղյանն ու Աշոտ Մարդանյանը, ինչպես նաև նախագահի գլխավոր ռազմական տեսչության ավագ տեսուչ, գնդապետ Ալբերտ Սարգսյանը: Նախագահի գլխավոր ռազմական տեսչության մեկ այլ ավագ տեսուչ, գնդապետ Ներսես Մուրադյանը պարգևատրվել է մարտական ծառայության մեդալով:

Առողջապահության բնագավառում ներդրած նշանակալի ավանդի համար` «Սերգեյ Մալայանի անվան ակնաբուժության կենտրոն» ՓԲԸ տնօրեն, բժշկական գիտությունների դոկտոր, պրոֆեսոր Ալեքսանդր Մալայանը պարգևատրվել է Մխիթար Հերացու մեդալով: Հայրենի մշակույթի զարգացման գործում ունեցած մեծ վաստակի համար ՀՀ մշակույթի վաստակավոր գործչի պատվավոր կոչում է շնորհվել Պատմության թանգարանի տնօրեն Անելկա Գրիգորյանը և Սերգեյ Փարաջանովի թանգարանի տնօրեն Զավեն Սարգսյանը:

Գիտության վաստակավոր գործչի կոչում է շնորհվել առողջապահության ազգային ինստիտուտի աչքի հիվանդությունների ամբիոնի վարիչ, բժշկական գիտությունների դոկտոր, պրոֆեսոր Լևոն Բարսեղյանին, Բժշկական համալսարանի վիրաբուժական հիվանդությունների թիվ 1 ամբիոնի վարիչ, բժշկական գիտությունների դոկտոր, պրոֆեսոր Հովհաննես Սարուխանյանին:

Վաստակավոր բժշկի կոչմանն են արժանացել «Միքայելյան վիրաբուժության ինստիտուտ» պրոկտոլոգիայի կենտրոնի ղեկավար, բժշկական գիտությունների դոկտոր, պրոֆեսոր Ալեքսանդր Աղավելյանը, ինչպես նաև «Նորք-Մարաշ» բժշկական կենտրոնի սրտի վիրաբուժության բաժանմունքի վարիչ, բժշկական գիտությունների թեկնածու Վիլեն Մանուկյանը, Բժշկական համալսարանի նոր հիվանդությունների ամբիոնի պրոֆեսոր, բժշկական գիտությունների դոկտոր Արթուր Շուքուրյանը, «Միքայելյան վիրաբուժության ինստիտուտ» ՓԲԸ նյարդավիրաբուժության բաժնի վարիչ, բժշկական գիտությունների թեկնածու Անդրոնիկ Քալայջյան: