Ձեր վստահելի աղբյուրը

Այսօր «Զվարթնոց» օդանավակայանի օրերս բացված նոր մեկնման սրահից տեղի ունեցավ առաջին չվերթը: Ինչպես լրագրողներին ասաց, «Արմենիա» հայկական միջազգային օդանավակայաններ ՓԲԸ մամուլի քարտուղար Գևորգ Աբրահամյանը, նոր սրահն ունի այն բոլոր ծառայությունները, որ ունենում են բարձրակարգ օդակայանների ուղևորային համալիրները: Նոր մեկնման համալիրում անձնագրային ստուգման սեղանները հասցվել են 12-ի, և սրահը կարող է սպասարկել ժամում 800-1000, իսկ տարեկան կտրվածքով` 2 մլն ուղևորի /անցյալ տարի Զվարթնոց համալիրը սպասարկել է մոտ 1,2 մլն ուղևորի/: Ըստ Գ. Աբրահամյանի, մեկնող ուղևորն այսուհետ մաքսային ստուգում չի անցնի, փոխարենը նախատեսվում է միայն սահմանային զննում: «Արմենիա» միջազգային օդանավակայաններ ՓԲԸ տնօրեն Պաբլո Գեչիջյանի հավաստմամբ, նոր համալիրը կարող է միաժամանակ սպասարկել վեց չվերթ: «Նոր համալիրն ունի Duty-free ծառայություն, գեղեցիկ նստարաններ ուղևորների համար, որոնք նայում են դեպի թռիչքադաշտ ու Արարատ լեռը, սրճարան, նոր զուգարաններ, բիզնես հատված` բիզնես կարգի ուղևորների համար և հատուկ առանձնացված հատված ծխելու համար:

Համալիրը պատրաստ է սպասարկել նաև տարանցիկ չվերթներ»,- նշեց Պ. Գեչիջյանը, հավելելով, որ դրանք իրականացնելու մասին պետք է մտածեն առաջին հերթին ավիաընկերությունները և քաղավիացիան: «Ե՛վ իր սպասարկման որակով, և՛ տարանցիկ չվերթներ ընդունելու առումով «Զվարթնոցը» եզակի է այս տարածաշրջանում և դա մրցակցային մեծ առավելություններ է տալիս հայկական ավիաընկերություններին»,- հավելեց նա: Նշենք, որ 2010-ին շահագործման կհանձնվի ևս մեկ համալիր, որը, ինչպես նշեց Պ. Գեչիջյանը, կլինի ամբողջությամբ ապակեպատ, կունենա երկհարկանի ավտոկանգառ, որի վերևում նախատեսվում է այգի կառուցել: Նոր կառուցվելիք համալիրի վրա նախատեսվում է ծախսել 100 մլն դոլար գումար, նույնքան էլ ծախսվել է արդեն կառուցված հատվածի համար: Ըստ «Արմենիա» միջազգային օդանավավակայաններ ՓԲԸ տնօրենի, իրենք նախատեսում են ներդրված գումարները ետ ստանալ 30 տարվա ընթացքում: Անդրադառնալով օդանավակայանի հին շենքի ճակատագրին, նա նշեց, որ այդ ուղղությամբ դեռ որոշում չեն կայացրել, սակայն 2010-ից այդ շենքը որպես օդակայան այլևս չի օգտագործվելու: