Ձեր վստահելի աղբյուրը

Ադրբեջանի վեց քաղաքացիներ, որոնք նախկինում ապրել են Լաչինում, հայց են ներկայացրել մարդու իրավունքների եվրոպական դատարան` պահանջելով փոխհատուցել իրենց կրած վնասը: Հայցն ընդունվել է ընդդեմ Հայաստանի, և դատարանն արդեն որոշել է հայցը քննարկել: Ադրբեջանցի քաղաքագետ Իլգար Մամեդովը կարծիք է հայտնել, որ Լաչինի ճակատագիրը Լեռնային Ղարաբաղի հակամարտության խաղաղ կարգավորման առանցքային հարցերից մեկն է: Ընդ որում նա արձանագրում է, որ ԵԱՀԿ Մինսկի խմբի համանախագահներն այժմ խոսում են բանակցություններում լուրջ առաջընթացի մասին, իսկ ամերիկացի համանխագահ Մեթյու Բրայզան բավականին լավատեսական հայտարարություն է արել երկու երկրների առաջիկա հանդիպման վերաբերյալ: Հիշեցնենք, որ Մեթյու Բրայզան հայտարարել էր, որ «կողմերը պայմանավորվել են հայկական կողմի հսկողության տակ գտնվող շրջանների վերադարձման մասին»:

Միջնորդի հայտարարությանը հետևել է Հայաստանի արտգործնախարարության արձագանքը. «Քանի դեռ չի սահմանվել Լեռնային Ղարաբաղի կարգավիճակը, չի ապահովվել Ղարաբաղի ժողովրդի ինքնորոշման իրավունքը և անխափան աշխարհագրական կապը Հայաստանի և Լեռնային Ղարաբաղի միջև, հայկական կողմը չի պատրաստվում խոսել երրորդական հարցերի շուրջ»: Քաղաքագետի կարծիքով, հնարավոր է, որ մի շարք միջազգային կազմակերպությունների հորդորներով, որոշվել է հայ-ադրբեջանական հակամարտությունը տանել մի փոքր այլ հունով: Բարդությունը կայանում է նրանում, որ Լաչինը լքել են տասնյակ հազարավոր քաղաքացիներ: «Եթե նրանք իրենց սեփականության, դատական կարգով, համար փոխհատուցում ստանան, ապա նրանք գործնականում կորցնում են իրենց երկիր վերադառնալու իրավունքն ու շահագրգռվածությունը: Արդյոք դա չէ բանակցությունների սեղանին դրված բավականին թվով հարցերը մաղելու լավագույն միջոցը»,- նկատել է Ի. Մամեդովը:

«Հաշվի առնելով գրավյալ տարածքներ վերադառնալու գործնական բարդությունները, մեր այդ քաղաքացիները կնախընտրեն փոխհատուցում ստանալ, որը, ինչպես և Վրաստանի դեպքում, կֆինանասավորեն օտարերկրյա դոնորները: Դա նրանք կանեն «որպես ներդրում խաղաղ կարգավորման գործում»:

Երբ այլևս սեփականության նկատմամբ պահանջատեր չի մնա, ապա Ադրբեջանին` «Լաչինի միջանցքի» հարցում Հայաստանին զիջում անել, ստիպելն առավել հեշտ կլինի»,-ամփոփել է քաղաքագետը: