Ձեր վստահելի աղբյուրը

ՀՀ տնտեսական դատարանում այսօր պետք է շարունակվեր «Շանթ» ՍՊԸ-ն ընդդեմ անհատ ձեռնարկատեր Վահան Հակոբյանի դատավարությունը, սակայն պատասխանող կողմի միջնորդությամբ դատական նիստը հետաձգվեց, քանի որ գործում ընդգրկված նոր փաստաբանին ժամանակ էր հարկավոր գործի նյութերին ծանոթանալու համար: Իսկ դատական այս պատմությունը սկիզբ էր առել դեռ 2006 թվականին, երբ հոկտեմբեր ամսին հեղինակային իրավունքով «Շանթ» ՍՊԸ-ին պատկանող «Հորիզոր» հաղորդաշարի հյուրն է եղել հեղինակ-երգիչ Արթուր Մեսչյանը: Հաղորդման ընթացքում ներկայացվել է երգչի մի քանի կատարումներ, որոնք հետագայում անօրինական ճանապարհով վերատադրվել ու վաճառվել են: Այսպիսով, «Շանթ» ՍՊԸ-ում համարում են, որ խախտվել է իրենց հեղինակային և հարակից իրավունքը, ինչը սահմանված է «Հեղինակային և հարակից իրավունքների մասին» ՀՀ օրենքով: Ընկերությունն իր հեղինակային ու հարակից իրավունքները պաշտպանելու գործը, ի տարբերություն շատերի, վստահել է ՀՀ տնտեսական դատարանին: Դատարանում որպես պատասխանող կողմ է հանդես գալիս անհատ ձեռներեց Վահան Հակոբյանը:

Օրենսդրության համաձայն պատասխանող կողմը պարտավոր էր մինչև սկավառակների ստեղծման և իրացման գործունեություն ծավալելը նախապես, օրենքով սահմանված կարգով, թույլտվություն ստանալ, ինչը, սակայն չի արել: Ուստի, հայցվոր կաղմը դատարանից խնդրում է կասեցնել Վ. Հակոբյանի կողմից «Շանթ» ՍՊԸ-ի իրավունքները խախտող գործունեությունը, բռնագրավել ու ոչնչացնել «Շանթ»-ին պատկանող բոլոր տեսակի կրիչների օրինակները, նյութերն ու սարքավորումները:

Տնտեսական դատարանում հետաձգվեց նաև «Շանթ» ՍՊԸ-ի հայցի հիման վրա ընթացող հաջորդ դատավարությունը: Խնդիրը կրկին վերաբերում է հեղինակային և հարակից իրավունքներին: Այս դեպքում կրկին, խախտելով «Շանթ» ՍՊԸ-ի իրավունքները 2006 թվականի ընթացքում «Շանթ» հեռուստաընկերությամբ հեռարձակված հեղինակային իրավունքնով «Շանթ»-ին պատկանող «Հայսուպերսթար» հաղորդումը, առանց օրինական հիմքերի վերատադրվել և թողարկվել է ձայնասկավառակի տեսքով: Ձայնասկավառակը հայցվոր կողմը հայտնաբերել է Աբովյան 32 հասցեում գտնվող խանութից, իսկ նշված խանութում առևտրային գործունեություն իրականացնում է անհատ ձեռնարկատեր Սոնա Վարժապետյանը: Այս դեպքում ևս հայցվորը դատարանից խնդրում է կասեցնել Սոնա Վարժապետյանի` «Շանթ» ՍՊԸ-ի իրավունքները խախտող գործունեությունը, բռնագրավել և ոչնչացնել «Շանթ»-ին պատկանող «Հայսուպերսթար» հաղորդման ձայնագրության հնարավոր բոլոր տեսակի կրիչներն ու նյութերը:

«Հեղինակային ու հարակից իրավունքների խախտումների մասին այսօր շատ ենք խոսում, բայց դատական ատյաններում նման հարցեր հազվադեպ են հանդիպում»,- մեզ հետ զրույցում ասաց «Կարախանյան և ընկերներ» իրավաբանական գրասենյակի փաստաբան Արամ Կարախանյանը: Ըստ նրա, հեղինակներն ու հարակից իրավունքներ ունեցող անձինք իրենց իրավունքները, սովորաբար փորձում են պաշտպանել այլ եղանակներով կամ ընդհանրապես չպաշտպանել.«Բողոքում են, որ կեղծումներ կան հեղինակային իրավունքների խախտվում են, բայց նրանք հիմնականում համակերպվում են իրավիճակի հետ և այսօր իրավական հարթությունը նման գործերով ծանրաբեռնված չէ»: Իսկ գուց՞ե իրավական դաշտը կարգավորված չէ, մեր հարցին փաստաբանը պատասխանեց. «Ես այդ կարծիքին չեմ, կան հստակ օրենքներ, որոնք պետք է կիրառել և կիրառման արդյունքում բացահայտել, օրենդրական բաց կա՞, թե` ոչ: Բայց քանի դեռ գործընթացներ չեն եղել ու չեն հայտնաբերվել այդ բացերը, ուղղակի լուրջ չի այդպես ասելը»: Որպես իրավաբան Արամ Կարախանյանը կոչ է անում շահագրգիռ մարդկանց` համատեղ իրավական պայքար մղել, ինչի արդյունքում, այս բնույթի իրավախախտումները համատարած չեն լինի: