Ձեր վստահելի աղբյուրը

Այսօր Panorama.am-ի խմբագրություն էին զանգահարել Արաբկիր համայնքի մի խումբ բնակիչներ: Նրանք իրենց վրդովմունքն ու դժգոհությունն էին հայտնում համայնքի էլեկտրականության մատակարարումից. «Արդեն քանի տարի է, եթե ոչ ամեն օր, ապա լավագույն դեպքում, օրվա մեջ մի քանի ժամով, տարբեր ժամերի համայնքը հոսանքազրկվում է»,-մեզ հետ զրույցում ասում էր բնակիչներից մեկը: Նրանք վստահեցնում են, որ պարբերաբար զանգահարում և համապատասխան մարմիններին ներկայացնում են իրավիճակը, վերջիններն էլ խոստանում են լուծել հարցը, սակայն մի քանի տարի է վիճակը նույնն է:

Մենք ևս փորձեցինք զրուցել «այդ» համապատասխան մարմինների հետ և ծանոթանալ իրավիճակին: Արաբկիր համայնքի էլեկտրացանցի «Հյուսիս» մասնաճյուղի գլխավոր ճարտարագետ Հրաչ Ավագյանին հարցրեցինք, թե ինչո՞վ է պայմանավորված համայնքի հաճախակի հոսանքազրկումը: Պրն. Ավագյանն ասաց, որ այսօր առավոտյան որոշ ժամանակով հոսանքազրկվել է համայնքի Բաղրամյան պողոտան, «մինչև որ վերականգնվել է պահուստային մալուխը»: Իսկ ընդհանրապես, գլխավոր ճարտարագետը համաձայն չէ, որ հոսանքազրկումներ հաճախակի են լինում.«Վթարներ լինում են, վերականգնում ենք, այս պահին էլ Բաղրամյան պողոտայում էլեկտրաէներգիան վերականգնվել է»,-ասաց նա: Ի պատասխան մեր հարցին, թե հնարավո՞ր է, որ համայնքում հոսանքի մալուխները հին ու շարքից դուրս եկած են, և հենց այդ պատճառով է հաճախ հոսանքազրկվում Արաբկիրը, Հ. Ավագյանն ասաց.«Ճիշտ է կան մալուխներ, որոնք հնացած են և մենք այդ հարցով արդեն դիմել ենք «Հայցանց», իսկ վերականգնման աշխատանքներ պարբերաբար անցկացվում են:


Իսկ բնակիչներն արդարացիորեն նշում են, որ հաճախակի դարձած հոսանքազրկումների պատճառով շարքից դուրս են գալիս մի շարք տեխնիկական սարքեր` հեռուստացույց, սառնարան, համակարգիչ և այլն: Բնակիչները, որոնք խնդրին արդեն մի քանի է տարի է ծանոթ են, լրջորեն մտածում են տեխնիկական սարքավորումների անվտանգությունն ապահովող լրացուցիչ սարքեր տեղադրելու մասին, բայց արդյո՞ք բոլորն են ի վիճակի դիմել նման միջոցների: Բացի այդ, սա կարող էր բավարար լինել, եթե Արաբկիրի բնակիչները, մտահոգված լինեին, ասենք միայն սառնարանների ու հեռուստացույցների համար: Բայց չէ, որ համայնքում մարդիկ նաև աշխատանքային գործունեություն են ծավալում և ավելի քան հասկանալի է, թե հաճախակի ու առանց զգուշացնելու հոսանքազրկումն ինչքան անախորժություններ է պատճառում նրանց:

Խմբագրություն զանգահարածներից մենկ էլ պնդում էր, որ հոսանքը ոչ թե 220 վոլտ է կազմում, այլ` 190: Քաղաքացին սա պարզել է տեղադրած սարքի միջոցով: Ի դեպ, ըստ նրանց, այս ամենի պատճառն այն է, որ «Հայաստանի էլեկտրական ցանցեր» ՓԲԸ շուկայում մենաշնորհային դիրք է զբաղեցնում: