Ձեր վստահելի աղբյուրը

«Ոչ մի երկիր չի կարողացել սկզբում նախապատրաստվել, և հետո միայն սեփականաշնորհում իրականացնել, իսկ դա նշանակում է, որ դա ուղղակի անհնար է եղել»,- այսօր Կոնգրես հյուրանոցում իր նոր աշխատությունը ներկայացնելու ժամանակ հայտարարեց ՀՀ նախկին վարչապետ Հրանտ ԲԱԳՐԱՏՅԱՆԸ: Նրա խոսքով, այդ ժամանակահատվածում շահեցին այն երկրները, որոնք կարողացան ավելի արագ իրականացնել մասավորեցումը և տնտեսական բարեփոխումները: Անդրադառնալով տնտեսական բարեփոխումների տեմպերին, Հ. Բագրատյանը նկատեց, որ «երբ տնտեսական բարեփոխումները դանդաղում են, քաղաքական բարեփոխումները ուղղակի կանգ են առնում, իսկ օտարերկրյա ներդումները ոչ միայն նպաստում են տնտեսության զարգացմանը, այլ որ ավելի կարևոր է, դրանք չեն թողնում, որ տեղական տնտեսությունը և քաղաքական էլիտան լկտիանան»: Նրա համոզմամբ, ամեն ինչ պետք է անել, որպեսզի պետական բիզնեսը հնարավորինս հեռու լինի պետական կառավարումից, որովհետև սկզբում բիզնեսի օգնությամբ մարդիկ դառնում են օլիգարխ, ապա մտնելով խորհրդարան տնտեսական բարեփոխումների դեմ «բլոկ են դնում»:

Այսօր, ըստ նախկին վարչապետի, ուղղակի անհնար է օղու ակցիզը բարձրացնել, քանի որ խորհրդարանում 9 պատգամավոր այդ բիզնեսում ներգրավված գործարարներ են, չնայած բոլորն են հասկանում, որ միայն այդ ճանապարհով կարելի է հավասար պայմաններ ապահովել օղու և գինու շուկաների միջև: Այնուհետև խոսելով դրամի արժևորման մասին, որը ըստ ԿԲ նախագահի պայմանավորված է արտասահմանից Հայաստան մտնող 1.5 մլրդ դոլարի հասնող մասնավոր տրանսֆերտներով, Հ. Բագրատյանը, նախ չհամաձայնեց, որ այդ քանակի գումարներ են մտնում Հայաստան, ապա հավելեց, որ եթե անգամ դա այդպես է, ապա ԿԲ-ն կարող է որոշակի ծրագրերով «ստերիլիզացնել այդ գումարները»: Մասնավորապես, ըստ նրա, կարելի է արժեթղթեր թողարկել և այդ գումարները ուղղել նոր ատոմակայանի կառուցմանը, իսկ ԿԲ-ն եթե անգամ արժեթղթեր թողարկում է, դա թողարկում է դրամով, ինչի արդյունքում պակասում է դրամի առկայությունը շուկայում և էլ ավելի խորացնում դրամի արժևորման պրոցեսը: «Մինչև նոր ատոմակայան չկառուցենք, հինը փակելու իրավունք չունենք»,- հավելեց նա: