Ձեր վստահելի աղբյուրը

Որոշ երկրներում մարդկանց ավելի բարոյական դարձնելու համար այնպիսի զարմանալի միջոցների են դիմում, որ առաջին հայացքից թվում է, թե միջնադարում ենք ապրում: Դրա վառ օրինակներից մեկի մասին Panorama. am-ն արդեն տեղեկացրել է. Իրանի խորհրդարանում նոր ընդունված օրենքով, մահապատիժ է սահմանվում պոռնոգրաֆիկ նյութեր արտադրելու և դրանք տարածելու համար: Խորհրդարանի կողմից ձայների մեծամասնությամբ ընդունված այդ օրինագիծը շուտով պետք է քննարկի նաև Սահմանադրական վերին ատյանը` Պահապանների Խորհուրդը, որի ընդունումից հետո միայն օրինագիծը կմտնի ուժի մեջ: Օրինակ, Սաուդյան Արաբիայում պոռնոգրաֆիայի համար մարդկանց մահապատժի չեն ենթարկում: Բայց պատիժն այնուամենայնիվ, դաժան է. մարդը, որը պոռնոգրաֆիա է տարածել բջջային հեռախոսի միջոցով, պատժվում է ճիպոտի 1000 հարվածով և դատապարտվում է ազատազրկման 12 տարով, ինչպես նաև տուգանվում է 26 հազար ԱՄՆ դոլարով:

Իսկ ահա Չինաստանի իշխանությունները մարդկանց բարոյական դարձնելու համար պայքարում են ոչ պակաս խիստ միջոցներով: Նրանք էլ որոշել են չինովնիկների անձնական կյանքը իրենց անմիջական ու ամբողջական հսկողության տակ վերցնել: Իրավիճակն աբսուրդային է ստացվում. քաղծառայողները իրենց ընկերուհիներին պարտավոր են գրանցել հիմնարկի կադրերի բաժնում: Եթե հանկարծ պարզվի, որ ինչ-որ չինովնիկի մոտ հայտնվի «չգրանցված» ընկերուհի, ապա նրան պատիժ է սպասվում` աշխատանքից հեռացնելուց մինչև ազատազրկում: Չինովնիկների համար այս նոր օրինագիծը մշակել է Վէյ Շաոցզինը: «Օրինագծում մենք հատուկ ենք նշել սիրուհիներին գրանցելու մասին հոդվածը, որովհետև դա շատ կարևոր է»,- ասել է օրինագծի հեղինակը:

Բացի այդ, չինացի չինովնիկներին գնահատելու են 100 բալանոց սանդղակով, իմանալու, թե ով է քիչ կամ շատ մեղավորը: Եթե ինչ-որ մեկն առանց թույլտվության երկրորդ երեխան է ունենում, որպես պատիժ գնահատվում է 50 բալով և ստանում առաջին նախազգուշացումը: Եթե չինովնիկը խաղամոլ է և Չինաստանում արգելված մոլախաղերով է տարված, ապա ստանում է 70 բալ և նրա դեմ միանգամից քրեական գործ է հարուցվում: Չինական այս տարօրինակ օրինագծի համաձայն, մեղադրողներ պետք է լինեն կամ չինովնիկի կինը, կամ էլ` նրա ընկերները:

Բարոյականության հարցերում չինացիների համար ամենավառ օրինակը եղել է իմպերատորի խորհրդական Բաու Գուանը, ով մեկ ու կես հազար տարի առաջ գլխատել է իր որդուն այն բանի համար, որ վերջինս երիտասարդ սիրուհուն նախընտրել է իր տարեց կնոջից: Բաու Գուանին չինացիները համարում են «Աշխարհի ամենաարդար մարդը»:

Ի տարբերություն արևելյան ու ասիական այդ երկրների, եվրոպական երկրներում այդքան սկզբունքորեն չեն մոտենում բարոյականության մասին հարցերին: Օրինակ, Լիտվայում պոռնոգրաֆիայի համար մարդկանց տուգանում էին կամ նրանց դատապարտում մինչև 4 տարի ազատազրկման: Բայց հետո Լիտվայի խորհրդարանը օրենքում փոփոխություն է կատարել, և այժմ պատժի չափը հասել է մինչև 6 տարվա: Ֆրանսիական խորհրդարանը նույնպես փոփոխություններ է կատարել համապատասխան օրենսդրության մեջ և խստացրել մանկական պոռնոգրաֆիայի համար հասանելիք պատիժները: Այժմ երեխաների մասնակցությամբ պոռնոֆիլմերի համար մարդիկ կարող են դատապարտվել ազատազրկման 2 տարի ժամկետով, ինչպես նաև տուգանք` 30 հազար եվրոյի չափով:

Հայաստանում ևս Քրեական օրենսգրքով պատիժ է սահմանվում անչափահաս երեխաներին պոռնկագրական բնույթի համակարգչային ծրագրերի, կինոյի կամ տեսաֆիլմերի նյութերի, պատկերների կամ պոռնկագրական բնույթի այլ առարկաների ստեղծմանը մասնակից դարձնելու համար: Մեղավորներն օրենքով պատժվում են տուգանքով՝ նվազագույն աշխատավարձի չորսհարյուրապատիկից ութհարյուրապատիկի չափով, կամ կալանքով՝ առավելագույնը երեք ամիս ժամկետով, կամ ազատազրկմամբ՝ առավելագույնը երեք տարի ժամկետով: