Ձեր վստահելի աղբյուրը

Հունիսի 26-ը ժողովրդավարական աշխարհում Խոշտանգումների զոհերի աջակցության միջազգային օրն է: Հելսինկյան ասոցիացիայի նախագահ Միքայել ԴԱՆԻԵԼՅԱՆՆ այսօրվա ասուլիսում հայտարարեց, թե «Լևոն Գուլյանին ոստիկանությունում խոշտանգելով սպանել են»: Նա և ասուլիսին իր հետ ներկայացած ասոցիացիայի անդամ փորձագետ Ռուբեն ՄԱՐՏԻՐՈՍՅԱՆԸ լրագրողներին ներկայացրին իրենց ձեռքի տակ եղած և խոշտանգումների հետևանքով Գուլյանի սպանության մասին վկայող մի շարք փաստեր: «Նրա դիակը մեզ հստակ պատկերացում է տալիս, թե իրականում ինչ է տեղի ունեցել: Մենք նկարներ ու փաստեր ունենք, որ Գուլյանին սպանել են»,- հայտարարեց փորձագետը` ներկայացնելով իր ունեցած փաստերից մեկը: Ըստ այդմ, գործով քննիչ Չախոյանի արձանագրության համաձայն, մայիսի 12-ին ժամը 15:00-ի սահմաններում ոստիկանությունից ահազանգ է ստացվել այն մասին, որ կես ժամ առաջ հայտնաբերվել է Լևոն Գուլյանի դիակը:

«Սա բավականին հավատ ներշնչող ինֆորմացիա է, քանի որ այդ ահազանգի հիման վրա է հարուցվել քրեական գործ: Սակայն ոստիկանության հայտարարությունից պարզվում է, որ Գուլյանը վարչություն է եկել 14:30-ի սահմաններում, այնուհետև կես ժամ օպերատիվ հարցազրույց են վարել և 15:20-ի սահմաններում փախուստի փորձ է կատարել: Երկու փաստաթղթերն էլ պաշտոնական են: Ստացվում է, որ 14:30-ին սպանված Լևոն Գուլյանը դրանից 50 րոպե անց, փորձել է փախուստի դիմել: Այսինքն մի լկտի սուտ»,- ներկայացրեց Ռ. Մարտիրոսյանը: Բայց այսքանը նրա ներկայացրած միակ փաստը չէր:

Նա նկատեց, որ աշխատանքի բերումով վերջին տասը տարիների ընթացքում ստիպված է եղել մասնակցել շուրջ 300 դիազննման: «Անկեղծորեն ասեմ ու թող ներեն ինձ Գուլյանի հարազատները, այդ աստիճան խոշտանգված դիակ մինչ օրս իմ պրակտիկայում չեմ հանդիպել», - ընդգծեց փորձագետ Ռուբեն Մարտիրոսյանը` շեշտելով, որ Գուլյանի խոշտանգումներին հաջորդել է սպանությունը: Նա նաև նշեց, որ դատաբժիշկ Դարբինյանը, խախտելով Քրեական դատավարության մասին օրենքի 95-րդ հոդվածը, խուսափել է պատասխանել քննիչի հարցին, թե վնասվածքներ ստանալուց որքան ժամանակ անց է վրա հասել Գուլյանի մահը:

Միքայել Դանիելյանի համար անհասկանալի է, թե ինչու Գերմանիայից և Դանիայից Հայաստան եկած փորձագետները դատաբժշկական փորձաքննությունից հետո չհանդիպեցին Գուլյանի իրավահաջորդների հետ, ավելին, հրաժարվեցին հանդես գալ մամուլի ասուլիսով: «Ես այդքան էլ վստահ չեմ, որ նրանք անկողմնակալ են», - նկատեց իրավապաշտպան Դանիելյանը:
Նշենք, որ նրանց եզրակացության համաձայն, Գուլյանի մահը վրա է հասել ընկնելուց հետո և որ նրան ծեծի չեն ենթարկել:
Հանգուցյալ Լևոն Գուլյանի կինը` Ջեմմա Գուլյանը տեղեկացրեց, որ արտասահմանցի փորձագետների եզրակացությունն այժմ թարգմանվում է, ուստի չի կարող ասել` համաձա՞յն է այդ եզրակացության հետ, թե՞ ոչ:

Հելսինկյան ասոցիացիայում վճռական են տրամադրված, նրանք այսուհետև հանդես են գալու որպես Գուլյանի իրավահաջորդներ և իրենց ուշադրության ներքո են պահելու Գուլյանի մահվան գործի ընթացքը: «Ես արտերկրից իրավապաշտպանների դեսանտ եմ իջեցնելու, սրանով ամեն ինչ չի ավարտվելու», - իրենց հետագա անելիքներն ուրվագծեց Հելսինկյան ասոցիացիայի նախագահը: