Ձեր վստահելի աղբյուրը

- Պարոն Մանուկյան, դատարանները կարծես այս ընտրությունների ժամանակ թերծանրաբեռնված էին:
- Անկեղծ ասած, ես ուրախ կլինեմ, եթե ընտրական հարցերով դատարաններն ընդհանրապես չզբաղվեն: Կուզեի մեր երկրում կազմակերպվեին այնպիսի ընտրություններ, որ որևէ վեճ չծագեր դրանց առթիվ:

Այնուամենայնիվ, այս ընտրությունների վերաբերյալ եղան որոշակի վիճարկումներ, որոնք սակայն իրենց քանակով աննշան էին, համեմատած նախորդ ընտրությունների հետ: Մասնավորապես, եթե նախորդ ընտրությունների ժամանակ ընտրական ցուցակներում ընդգրկվելու վերաբերյալ Հայաստանի դատարաններն ստացել էին ավելի քան 5 հազար դիմումներ, ապա այս անգամ դրանց թիվն ընդամենը 80-ն էր: Ինչպես կարելի է սա մեկնաբանել, եթե ոչ ոստիկանության համապատասխան ծառայությունների լավ աշխատանքի արդյունք:

- Իսկ այլ բնույթի վեճեր եղե՞լ են դատարաններում:
- Դատարաններում ընտրական վեճերով մուտք են եղել, քննվել, ավարտվել են թվով 146 գործեր, որոնցից 80-ը, ինչպես արդեն նշեցի, վերաբերվել են ընտրական ցուցակներում ընդգրկվելուն: Մնացած գործերն իրենց մեծամասնությամբ վերաբերում են ընտրական հանձնաժողովների գործողությունների և որոշումների վիճարկմանը:

- Ասում են դատարանները զգուշանում են ընտրական հանձնաժողովների որոշումները անվավեր ճանաչելուց: Ասում են, նույնիսկ, Կենտրոնական ընտրական հանձնաժողովի դեմ ներկայացված բոլոր հայցերը մերժվել են…
- Ոչ, իհարկե: Դա այդպես չէ: Միայն մեկ օրինակ ինքս եմ հիշում, որտեղ դատարանը ապօրինի է ճանաչել հանձնաժողովի ակտը և պարտավորեցրել է վերականգնել դիմողի իրավունքը:

Իսկ դատարաններն այս հարցում զգուշանալու առիթ չունեն: Ընդհակառակը, կարծում եմ հանձնաժողովներն իրենք պետք է շահագրգիռ լինեն հնարավոր սխալի հայտնաբերման և ուղղման հարցում: Պաշտոնապես հայտարարում եմ, որևէ դատավոր նման որևէ վեճի քննության ժամանակ ճնշման կամ ապօրինի ներգործության չի ենթարկվել:

Ես կուզեի խոսել մեկ այլ երևույթի մասին: Վերջին ամիսներին դատարաններում հանդիպում ենք այսպես կոչված ՙդատական տեռորի՚ դրսևորման (ներողամիտ եղեք կոպիտ որակման համար): Սա մի իրավիճակ է, երբ որևէ անձ կամ կազմակերպություն միաժամանակ տասնյակ կամ հարյուրավոր հայցեր է ներկայացնում դատարան միևնույն հարցի վերաբերյալ: Ընդ որում, այդ հայցերը շատ հաճախ լինում են ակնհայտ անհիմն, առարկայազուրկ կամ դատարանի իրավասությանը ոչ ենթակա: Ակնհայտ է, թե նման հայցվորներն ինչ նպատականեր են հետապնդում. դա առաջին հերթին քաղաքական նպատակն է` ցույց տալ, թե որքան հայցեր են մերժվում դատարաններում, հատկապես` ընտրությունների հետ կապված: Երկրորդ, նման հայցերի հեղեղի մեջ հայտնաբերել հնարավոր դատական սխալները և դրանք դարձնել քաղաքական շահարկման առարկա:

Կարծում եմ, որ քաղաքական նկատառումներով դատարաններին այս գործընթացում նման անբարեխիղճ եղանակով ներգրավելն անթույլատրելի է և անհրաժեշտ է գտնել նման երևույթի դեմ պայքարելու օրենսդրական եղանակներ:

- Եղան մի շարք քրեական գործեր, որոնք հարուցվել էին ընտրակաշառքների և այլ ընտրակեղծիքների փաստերով: Դրանց մի մասով անձինք կալանավորվել են: Ինչպես կմեկնաբանեք այս երևույթը: Որքան հայտնի է, սա աննախադեպ երևույթ է, նախկին ընտրություններում նման իրավիճակ չի արձանագրվել:

-Ես հատուկ կուզեի ընդգծել այս երևույթի կարևորությունը: Բոլորս ականատես եղանք, որ պետությունը` կարևորելով այս երևույթի դեմ պայքարը, խստացրել է քրեական քաղաքականությունը:

Այսօր արդեն ընտրությունների արդյունքները կեղծելու և ընտրողի կամքի ազատ իրականացմանը խոչընդոտելու համար (առավել տարածված ձևը` ընտրակաշառք) դատապարտվել են 12 անձինք: Նրանցից մի քանիսը դատապարտվել են ազատազրկման և արդեն իսկ վերցված են կալանքի:

Միաժամանակ, Արագածոտնի դատարանում քննվում է թիվ 14 ընտրատարածքի թիվ 55 տեղամասային ընտրական հանձնաժողովի նախագահի վերաբերյալ գործըª ընտրությունների արդյունքներն ամփոփելիս ընտրողների ձայներն ակնհայտ սխալ հաշվելու և քվեարկության արդյունքները կեղծելու մասին, որով շուտով ակնատես կլինենք դատական ակտի կայացման:
Ես վստահ եմ, որ այս դատական գործերը էական ներգործություն կունենան հասարակական գիտակցության վրա: Հաջորդ ընտրություններում դրա արդյունքում նման երևույթների ծավալներն էականորեն կնվազեն:

Ընտրակաշառք բաժանողը կամ ձայներ կեղծողն արդեն լրջորեն կմտորի` դիմել նման քայլի, թե՝ ոչ: