Ձեր վստահելի աղբյուրը

«Մարդու իրավունքների եվրոպական դատարանն ունի 46 դատավոր, իսկ դատարան ընդունված գործերի քանակը անցնում է 80 հազարից»,- քաղաքական դասընթացների երևանյան դպրոցի մասնակիցների ՄԻԵԴ կատարած այցելության ժամանակ ասաց Հայաստանը ներկայացնող դատավոր Ալվինա Գյուլումյանը, ով հենց դրանով բացատրեց, որ գործերի քննությունը տևում է մինչև 3 տարի: Նրա խոսքով, ներկայումս քննարկվում է 14-րդ արձանագրությունը, որի ընդունման դեպքում ՄԻԵԴ ընդունված գործերը հնարավոր է խմբավորել, իսկ նվազ կարևորություն ունեցող գործերը քննել արագացված կարգով, «ինչը էապես կբեռնաթափի կուտակված աշխատանքը»: Ա. Գյուլումյանը նշեց, որ միայն Երևանի կենտրոնի բնակիչներից Եվրադատարանում կա ավելի քան 100 գործ, որոնք իրենց բնույթով շատ նման են միմյանց և եթե դրանցից մեկի վերաբերյալ որոշում կայացվի, այն նախադեպի ուժ կունենա և մյուս նմանատիպ գործերը կքննվեն ավելի արագ:

Անդրադառնալով «Ա1+»-ի գործի ձգձգման մասին հնչած հարցին, դատավորն ասաց. «Նման մի գործ կա նաև Խորվաթիայի հետ կապված և այն քննարկվելուց հետո, գուցե հնարավոր լինի դա կիրառել «Ա1+»-ի դեպքում»: Հանդիպմանը մասնակցող լրագրողներին հետաքրքրում էր, թե արդյոք մարդու իրավունքների եվրոպական դատարանում կա՞ հայ աշխատակից, ով պատասխանատու է Հայաստանից եկող դիմումները տեղ հասցնելու համար և ով երբեմն կորցնում է դիմումները ճանապարհին, Ա. Գյուլումյանը ասաց, որ իսկապես իրենք ունեն նման աշխատակից, սակայն, «նա շատ պարկեշտ, ազնիվ տղա է և նման բան չի անի»: Մեր ճշտող հարցին, թե նա գանգուր մազե՞ր ունի, քանի որ հայկական մամուլում տպագրվել էր դիմումները կորցնող տղայի լուսանկարը, Ա. Գյուլումյանը պատասխանեց. «Գանգուր է ո՞ր, ակնոցներով է»: