Ձեր վստահելի աղբյուրը

Սահմանադրական փոփոխությունների 108-րդ հոդվածով «Երևանը համայնք է: Երևան քաղաքում տեղական ինքնակառավարման մարմինների ձևավորման առանձնահատկությունները սահմանվում են օրենքով: Օրենքով կարող է սահմանվել Երևանի քաղաքապետի ուղղակի կամ անուղղակի ընտրություն»: Ու նշված այս օրենքի, մասնավորապես «Երևանի մասին» օրինագծի մշակման նպատակով ստեղծված միջգերատեսչական հանձնաժողովը երկար ընդմիջումից հետո շարունակում է աշխատել: Այս հանձնաժողովի անդամ, «Գերմանական տեխնիկական համագործակցության ընկերության» (GTZ) իրավական խորհրդատու, օրինագծի համահեղինակ Հրայր ԹՈՎՄԱՍՅԱՆԸ Panorama.am-ի թղթակցի հետ զրույցում ներկայացրեց, թե Երևանի քաղաքապետի ընտրության ո՞ր մոդելին են ավելի շատ կողմնակից հանձնաժողովի անդամները: Ըստ նրա, «Երևանի մասին» օրենքի նախագծով նախատեսվում է, որ քաղաքի ավագանին բաղկացած կլինի 55 անդամից և նրանք բոլորն էլ կընտրվեն համամասնական ընտրակարգով:

Իսկ ինչպե՞ս է ընտրվելու քաղաքապետը: Բանն այն է, որ ավագանիների համամասնական ընտրության ընթացքում որ կուսակցությունը, որ շատ ձայներ ստանա, ապա ցուցակի առաջին հորիզոնականը զբաղեցրած անձը կդառնա քաղաքապետ: Իսկ եթե այդպես չստացվի, ապա Երևանի ավագանին կլուծարվի: «Այս դեպքում ձևավորվում է միասնական քաղաքական թիմ, որը պատասխանատվություն է կրում քաղաքի բնականոն զարգացման համար»,- նշեց Հրայր Թովմասյանը: Երևանի ավագանու և քաղաքապետի ուղղակի ընտրության դեպքում իրավագետը չի բացառում, որ դրանք կընտրվեն տարբեր թիմերից, մանավանդ որ համապետական բոլոր ընտրությունների արդյունքում իշխանություն-ընդդիմություն ձայների հարաբերակցությունը զգալի է եղել: Այս դեպքում, ենթադրվում է, որ կստեղծվի ավագանիների տարաբևեռ խորհուրդ, ինչն արդյունավետ կառավարման տեսանկյունից չի արդարացնի իրեն: «Սակայն այս նոր մոդելի պարագայում հաղթում է քաղաքական մեկ թիմ, իսկ հաղթող թիմն էլ ստանձնում է քաղաքի կառավարման գործը: Այս մոդելը եվրոպական երկրներում բավականին տարածում ունի»,- հավելեց «Երևանի մասին» օրենքի նախագծի համահեղինակը: Նա չի բացառում, որ քաղաքապետի և ավագանու ընտրության այս մոդելը կկիրառվի նաև Հայաստանի մյուս խոշոր քաղաքներում:

Բացի Երևանի ավագանուց, օրինագծով նախատեսվում է, որ առանձին թաղերը ևս պետք է ունենան ավագանիներ, որոնք կընտրվեն մեծամասնական ընտրակարգով և կներակայացնեն տեղի բնակչության շահերը: Հանձնաժողովում, Հ. Թովմասյանի փոխանցմամբ, հակված են «թաղ» բառը փոխել և անվանել վարչական շրջան: Նշենք, որ Սահմանադրական փոփոխություններով, Երևանն այլևս համայնք է, իսկ համայնքի մեջ համայնք լինել չի կարող: Բացի այդ, նախատեսվում է ներկայիս 12 թաղային համայնքները պակասեցնել` հասցնելով 10-ի: Ըստ այդմ` միավորվելու է Նորք-Մարաշը Կենտրոնի հետ, իսկ Նուբարաշենն էլ` Էրեբունու: «Նրանք այլևս չեն լինելու որպես առանձին համայնքներ: Սրանով քաղաքի արդյունավետ կառավարման խնդիրն է լուծվում: Միջազգային փորձն էլ է ցույց տալիս, որ 200 հազարից ավելի բնակչություն ունեցող քաղաքներն ունեն տեղական ինքնակառավարման երկու մակարդակ»,- նշեց Հրայր Թովմասյանը: Ինչևէ, օրինագծի ընդունումը, ըստ Սահմանադրական փոփոխությունների, պետք է կազմակերպվի մինչև դեկտեմբերի 5-ը: Իսկ եթե ոչ` ապա կխախտվի Հայաստանի մայր օրենքը: