Ձեր վստահելի աղբյուրը

Մարդու իրավունքների Եվրոպական դատարանն այս տարի հունվար ամսին  կայացրեց առաջին վճիռը Հայաստանի Հանրապետության վերաբերյալ: «Մկրտչյանն ընդդեմ Հայաստանի» գործն ավարտվեց հօգուտ դիմումատու Արմեն Մկրտչյանի: Հիշեցնենք,  որ Արմեն Մկրտչյանը 2002 թվականին ենթարկվել էր վարչական պատասխանատվության` ցույցի, երթի մասնակցելու համար: Հայաստանի դատական ատյաններում Մկրտչյանին տուգանել էին 500 դրամով: Արմեն Մկրտչյանը դիմել էր Եվրոպական դատարան` պահանջելով, որ դատարանը Մարդու իրավունքների Եվրոպական կոնվենցիաի 11-րդ հոդվածի (ցույցերի և երթերի մասնակցելու ցանկացած անձի իրավունքը) խախտում համարի իրեն պատասխանատվության ենթարկելու հանգամանքը: Եվրոպական դատարանը Հայաստանի վերաբերյալ առաջին վճռով համարել էր, որ իսկապես, տեղի է ունեցել կոնվենցիայի խախտում:

Իսկ այս տարվա հունիսին  Մարդու իրավունքների Եվրոպական դատարանը կայացրեց հաջորդ`«Հարությունյանն ընդդեմ ՀՀ» գործով վճիռը:  Այս գործով դատարանը համարել է, որ Մ. Հարությունյանը Հայաստանի դատական ատյաններում զրկված է եղել արդար դատաքննության իրավունքից: ՀՀ կառավարությունը Մ. Հարությունյանին պարտավորվել էր վճարել Եվրոդատարանի վճռով սահմանված՝ բարոյական վնասի փոխհատուցման 4 հազար եվրո գումար:

Նշված գործով վերջերս հայտարարությամբ հանդես  էր եկել փաստաբանական պալատի փաստաբան Հայկ Ալումյանը: Վերջինս ասել էր, թե Հայաստանի Հանրապետությունը չի կատարում Եվրոպական դատարանի վճիռը: Փաստաբանը հայտարարել է նաև, որ պետությունը պաշտոնապես չի թարգմանում հայերեն և չի հրապարակում դատարանի վճիռը:

«Նշված տեղեկատվությունը չի համապատասխանում իրականությանը և չի բխում Մարդու իրավունքների և ազատությունների պաշտպանության մասին Եվրոպական Կոնվենցիայի և «Հարությունյանն ընդդեմ Հայաստանի» գործով դատարանի կողմից կայացրած վճռի պահանջներից» փաստաբանի հայտարարությանն ի պատասխան այսօր հայտնեցին ՀՀ արդարադատության նախարարությունից:  Մասնավորապես, ըստ ՀՀ ԱՆ-ի Եվրոպական կոնվենցիայի համաձայն Եվրոպական դատարանի վճիռը վերջնական է դառնում և ձեռք է բերում օրինական ուժ դրա կայացման պահից երեք ամիս հետո:

Նշված` «Հարությունյանն ընդդեմ Հայաստանի» գանգատով ևս Եվրոպական դատարանի վճռի եզրափակիչ մասի 4-րդ կետի համաձայն, Հայաստանի Հանրապետությունը պարտավոր է դիմումատուին տրամադրված արդարացի փոխհատուցումը, ինչպես նաև վճռի թարգմանությունը և հրապարակումը իրականացնել վճիռը օրինական ուժի մեջ մտնելուց հետո երեք ամսվա ընթացքում: Հաշվի առնելով այն հանգամանքը, որ խնդրի առարկա գործով Եվրոպական դատարանի վճիռը կայացվել է 2007 թվականի հունիսի 28-ին, այն վերջնական է դառնում 2007 թվականի սեպտեմբերի 28-ին, հետևաբար, ՀՀ կառավարությունը այն պարտավոր է կատարել մինչև 2007 թվականի դեկտեմբերի 28-ը: ՀՀ կառավարությունն, այսպիսով, իր պարտավորությունները` կապված «Հարությունյանն ընդդեմ Հայաստանի» Եվրոպական դատարանի վճռի հետ, կկատարի Եվրոպական կոնվենցիայով նախատեսված և Եվրոպական դատարանի կողմից նշված ժամկետներում:

Ի դեպ, ինչպես Եվրոպական դատարանում ՀՀ կառավարության լիազոր ներկայացուցիչ, արդարադատության փոխնախարար Գևորգ Կոստանյանն ասաց,  ՀՀ պաշտոնական տեղեկագրում կրահարակվի նաև Հայաստանի վերաբերյալ Եվրոպական դատարանի կայացրած առաջին վճիռը` «Մկրտչյանն ընդդեմ ՀՀ-ան» գործով:

Եվրոպական դատարանում ՀՀ կառավարության լիազոր ներկայացուցիչ Գևորգ Կոստանյանն ասում է նաև, որ.«Բացի այն, որ Եվրոպական դատարանում պաշտպանում են պետության շահերը, միաժամանակ գործերի քննության ընթացքում հայտնաբերում են որոշակի իրավիճակներ, երբ պաշտոնական անձանց թերացումները կարող են հանգեցնել Եվրոպական դատարանի կողմից Հայաստանի դեմ վճիռների: Դրանց անհապաղ տրվում է համապատասխան արձագանք: Այսինքն, որոշ առումով նաև կանխարգելիչ գործողություններ ենք կատարում»: