Ձեր վստահելի աղբյուրը

Եվրոմիության` Հայաստանին ուղղված պահանջներից մեկը Մեծամորի ատոմակայանի փակումն է: Ինչպես այսօր լրագրողների հետ հանդիպման ժամանակ հայտարարեց Եվրոպական հանձնաժողովի արտաքին կապերի գլխավոր տնօրինության Արևելյան Եվրոպայի, Հարավային Կովկասի և Կենտրոնական Ասիայի վարչության գործող տնօրեն Գուննար Վիգանդը, «Եվրոատոմ» կազմակերպությունը ատոմակայանի փակման և այլընտրանքային աղբյուրների ստեղծման նպատակով պատրաստ է արտոնյալ պայմաններով 200 մլն եվրո վարկ տրամադրել մեր երկրին:


Եվրոհանձնաժողովի ներկայացուցչի խոսքով, ատոմակայանի երկարատև շահագործումը չի կարող անվտանգ լինել, ուստի Հայաստանը պետք է գտնի այլ աղբյուրներ` ապահովելով էներգետիկ աղբյուրների դիվերսիֆիկացում: Նրա համոզմամբ, այժմ մեր երկրում դրան ուղղված քայլեր ձեռնարկվում են, իսկ այլընտարնքային տարբերակները պետք է որոշի մեր կառավարությունը:

Գ. Վիգանդն ընդգծեց, որ տրամադրված վարկը չի կարող օգտագործվել մեկ այլ միջուկային ատոմակայանի ստեղծման համար, և մեր երկրի կողմից նման ծրագիր ներկայացնելու դեպքում ԵՄ-ն պետք է մանրամասն այն քննարկի: Իր հերթին փոխարտգործնախարար Արմեն Բայբուրդյանն ասաց, որ մեր երկիրը պատրաստակամ է ատոմակայանը փակելու հարցում: «Խնդիրը այլընտրանքային աղբյուրներով այն փոխարինելու և դրանց ժամկետների հետ է կապված»,-ասաց նա, հավելելով, որ այդ առումով այժմ մշակվում է միջոցառումների ծրագիր:

Հիշեցնենք, որ Գ. Վիգանդը ԵՄ այլ ներկայացուցիչների հետ Երևան էր ժամանել` մասնակցելու սեպտեմբերի 24-ին և 25-ին ԵՄ-Հայաստան համագործակցության կոմիտեի 8-րդ նիստին: Նախորդ նիստը տեղի էր ունեցել 2006 թ. հոկտեմբերին Բրյուսելում: