ՊԱՐԳԵՎ ՕԱՀԱՆՅԱՆ . «ՄԻ ՀԵՐՈՍԱՑՐԵՔ ԻՆՁ, ԵՍ ԸՆԴԱՄԵՆԸ ԱՐԴԱՐԱԴԱՏՈՒԹՅՈՒՆ ԵՄ ԻՐԱԿԱՆԱՑՐԵԼ»

Իրավունք 14:42 27/09/2007

ՀՀ արդարադատության խորհուրդը քիչ առաջ ավարտեց մայրաքաղաքի Կենտրոն և Նորք, Մարաշ համայնքների առաջին ատյանի դատարանի դատավոր Պարգև Օհանյանի հարցով նիստը: Հիշեցնենք, որ դատավորի նկատմամբ հարուցվել էր կարգապահական վարույթ, ինչի արդյունքում վերջինի վարած գործերում, ըստ դատական դեպարտամենտի աշխատակիցների ուսումնասիրությունների, հայտնաբերվել էին խախտումներ: Ինքը` դատավոր Պ. Օհանյանը համարում է, որ այդ խախտումները «հիմնավորված չեն, էական չեն և հետևանք չեն ունեցել»:

Մինչ Արդարադատության խորհուրդը կհեռանար խորհրդակցական սենյակ, դատավոր Պարգև Օհանյանը հանդես եկավ փոքրիկ ելույթով, որում մասնավորապես ասաց.

«Հարգելի խորհուրդ,
Աստվածաշունչն ասում է` մի արա ուրիշին այն, ինչը չես ցանկանա, որ քեզ անեն: Ես դատավոր եմ, համենայն դեպս առայժմ, քաղաքականությամբ իրավունք ու ցանկություն չունեմ զբաղվելու: Ես ընդդիմադիր չեմ, ես ինքս եմ իշխանությունը, իսկ ամեն մի իշխանություն Աստծուց է:

Ես շնորհակալ եմ, այն հնարավորության համար, որը թույլ տվեց հասկանալ, այն մարդկանց վիճակը, որոնք անմեղ-անմեղ կանգնում են դատարանի առաջ:

Հարգելի խորհուրդ, մի հերոսացրեք ինձ, ես ընդամենը իմ գործն եմ արել` արդարադատություն եմ իրականացրել, օրենքը կիրառել, օրենքի գերակայությունը պահպանել:

Որպես իշխանության ներկայացուցիչ, ի դեմս խորհրդի, եթե հարազատ իշխանությունը կգտնի, որ ես արժանի չեմ իրեն, ես ինքս էլ կհասկանամ, որ դա այդպես է»,- խոսքն ամփոփեց Պարգև Օհանյանը, ինչին դահլիճում հաջորդեցին ծափահարությունները:

Նշենք, որ Արդարադատության խորհուրդն իրավունք ունի կարճել հարուցած կարգապահական վարույթը, բավարարվել քննարկմամբ, տալ նկատողություն կամ խիստ նկատողություն, նախազգուշացում, ընդհուպ, դիմել ՀՀ նախագահին դատավորի լիազորություները դադարեցնելու համար:

Արդարադատության խորհուրդը Պարգև Օհանյանի հարցով իր որոշումը կհրապարակի հոկտեմբերի 12-ին, ժամը 10-ին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: