Ձեր վստահելի աղբյուրը

Այսօր ՀՀ սահմանադրական դատարանը հյուրընկալեց Հայաստան ժամանած Մարդու իրավունքների Եվրոպական դատարանի նախագահ Ժան Պոլ Կոստային: ՍԴ նախագահ Գագիկ Հարությունյանը Եվրոպական դատարանի հետ մեր երկրի համագործակցությունը տևական և ավանդական համարելով, հույս հայտնեց, որ այդպես էլ կշարունակվի նաև ապագայում: Ըստ Գագիկ Հարությունյանի, Ժան Պոլ Կոստայի այցը խորհրդանշական է, քանի որ Եվրոպայի խորհրդի անդամ երկրներից նա առաջինը Հայաստան է այցելել:

ՀՀ ՍԴ նախագահը նշեց, որ Եվրոպական դատարանին հասցեագրվող դիմումների թիվն աճում է երկրաչափական պրոգրեսիայով: Նման պայմաններում իրավիճակից արդյունվետ ելքեր են փնտրվում, իսկ դրանցից մեկը նա համարում է ազգային արդարադատական մակարդակի բարձրացումը և Եվրոպական դատարանի ինստիտուտների հետ արդյունավետ համագործակցությունը:

Մարդու իրավունքների Եվրոպական դատարանի նախագահ Ժան Պոլ Կոստան իր ելույթում նշեց, որ դատարան եկող դիմումներն արդեն մոտենում են 100.000-ի: «Եթե այս դատարանը գոյություն չունենար, անտարակույս, բազմաթիվ երկրներում մարդու իրավունքների պաշտպանության վիճակը շատ ավելի ծանր կլիներ»,-արձանագրեց Ժան Պոլ Կոստան:

Ըստ նրա, վերջին 20-30 տարիներին դատարանի կայացրած որոշումների քանակը շատ մեծ էր, բայց շատ կարևոր, դրանք, նրա խոսքով, թույլ են տվել օգնել ոչ միայն այն զոհերին, որոնց իրավունքները խախտվել են, այլ նաև
հնարավորություն են տվել Եվրախորհրդի անդամ երկրներին վերանայել իրենց գործունենությունը դատաիրավական դաշտում:

ՀՀ սահմանադրական դատարանը որոշեց հյուրին պարգևատրել ՍԴ ոսկե մեդալով: Գագիկ Հարությունյանը մեդալը հանձնելիս կատակեց, թե «նոր բողոք չէ, մեդալ է»: Ժան Պոլ Կոստան էլ իր հերթին, պատասխանեց կատակով, ասելով, որ չգիտի այս մեդալը հիմք ունի, թ՞ե ոչ: Շարունակելով նույն տրամադրությամբ Գ. Հարությունյանը խոստացավ քննարկել հարցը:

Ինչևէ, Եվրոպական դատարանի նախագահը ոսկե մեդալը համարեց Հայաստանի և Եվրոդատարանի համագործակցության հիանալի խորհրդանիշ:

Հիշեցնենք, որ Մարդու իրավունքների Եվրոպական դատարանի պատվիրակությունը մասնակցելու է վաղը Հայաստանում կայանալիք «Մարդու իրավունքների ապահովման և պաշտպանության բնագավառում Սահմանադրական դատարանների և Մարդու իրավունքների պաշտպանների համագործակցության միջազգային փորձը» խորագրով միջազգային համաժողովին: