Ձեր վստահելի աղբյուրը

Այսօր Հայաստանի վարչապետ Սերժ Սարգսյանն ընդունել է ՖԻՖԱ-ի նախագահ Յոզեֆ Բլատերին և ՈՒԵՖԱ-ի նախագահ Միշել Պլատինիին: Այս մասին հայտնում է կառավարության տեղեկատվության և հասարակայնության հետ կապերի վարչությունը:
Հանդիպմանը մասնակցել են նաև ՖԻՖԱ-ի Եվրոպական երկրների զարգացման մենեջեր Եվա Պասկելը, Հայաստանի սպորտի և երիտասարդության հարցերի նախարար Արմեն Գրիգորյանը, Հայաստանի ֆուտբոլի ֆեդերացիայի նախագահ Ռուբեն Հայրապետյանը:
Վարչապետը ողջունել է աշխարհահռչակ Յոզեֆ Բլատերի և Միշել Պլատինիի այցը Հայաստան և շնորհակալություն հայտնել հայկական ֆուտբոլին ցուցաբերվող աջակցության ու հոգածության համար: ՖԻՖԱ-ի և ՈՒԵՖԱ-ի նախագահները նշել են, թե աջակցության ծրագրերն առանց Հայաստանի կառավարության մասնակցության, դժվար հաջողություններ ունենան և ընդգծել են հատկապես կառավարության կողմից խաղադաշտերի համար հողատարածքների անվճար հատկացման, գույքային այլ աջակցությունների, ֆուտբոլի ֆեդերացիայի օժանդակության նպատակով գործադրվող կառավարության ջանքերը:
Համաշխարհային սպորտի շարժիչ ուժերից հանդիսացող ՖԻՖԱ-ի և ՈՒԵՖԱ-ի ղեկավարները երկուստեք նշել են, որ իրենց առաքելությունը և նպատակը բոլոր երիտասարդների, տվյալ դեպքում` հայ երիտասարդների համար ֆուտբոլ խաղալու հնարավորությունների ապահովումն է, այնպիսի պայմանների ստեղծումը, որ նրանք կարողանան այդ սպորտաձևում լիարժեք ինքնաարտահայտվել:
Վարչապետ Սերժ Սարգսյանը կառավարության անունից պատրաստակամություն է հայտնել այսուհետ ևս, հնարավորությունների սահմաններում, ամեն ինչ անել` նպաստելու Հայաստանում ֆուտբոլի զարգացմանը, ընդծելով, որ Հայաստանի կառավարությանն իր ծրագրային քաղաքականությամբ մեծապես կարևորում է ֆիզիկական կուլտուրայի և սպորտի զարգացումը, երիտասարդների համար առողջ ապրելակերպի պայմանների ստեղծումը: Վարչապետը գոհունակությամբ է խոսել Հայաստանի ֆուտբոլի ֆեդերացիայի և նրա ղեկավարի կողմից այդ սպորտաձևի զարգացման նպատակով իրականացվող աշխատանքների մասին, միաժամանակ նշելով, որ ֆուտբոլը ցանկալի մակարդակին հասցնելու համար ակնկալիքներն ավելին են, և հետագա համագործակցությունը ՖԻՖԱ-ի և ՈՒԵՖԱ-ի հետ, աջակցությունը Հայաստանի ֆուտբոլի ֆեդերացիային ուղղվելու է այդ ակնկալիքների իրականացմանը: