Ձեր վստահելի աղբյուրը

Ֆրանսիայում Հայաստանի տարվա շրջանակներում Մարսելում Արմեն-Կլոդ Մութաֆյանը`հայտնի սփյուռքահայ Զարեհ Մութաֆյանի որդին, իրականացրել է բացառիկ ցուցահանդես` «Հայոց մոգական գիրը» խորագրով: Այս մասին այսօր կայացած ամուլի ասուլիսում հայտնեց Ամենայն հայոց կաթողիկոսի մշակույթի խորհրդական, նախկինում Ազգային պատկերասրահի տնօրեն Շահեն Խաչատրյանը: Նրա տեղեկացմամբ, ցուցահանդեսում ներկայացվել են հայ արվեստի 320 օրինակներ, որոնց վրա եղել են հայկական տառեր:
«Լավագույն օրինակ կարող եմ համարել «Գոհար գորգը», Լևոն 5-րդի Ավետարանը: Այս հավաքածուի նմուշները հիմնականում ձեռք էի բերել ոչ Հայաստանից, այլ` տարբեր անհատական հավաքածուներից»,-ասաց Արմեն-Կլոդ Մութաֆյանը: Նրա խոսքով, ցուցադրվել են միայն բնօրինակներ:
Ինչպես նշեցին ասուլիսի մասնակիցները, Ֆրանսիայում Հայաստանի տարին այնքան էլ բարեկամական մթնոլորտում չի անցել: «Ֆրանսիական կողմը հայկական կողմի նկատմամբ որոշակի արհամարհական դիրք էր բռնել: Դա ինձ չի զարմացնում, քանի որ Ֆրանսիան կայսերապաշը երկիր է: Այլ ձևով կվարվեր Ամերիկայի հետ, այլ ձևով` Հայաստանի կամ Հնդկաստանի: Հայաստանի կողմից էլ մեծ սխալներ եղան: Կազմակերպիչներն ավելի շատ ուշադրություն էին դարձնում անունների, հրավիրատոմսերի, աֆիշաների ձևավորումների վրա, քան բովանդակության»,-նշեց Կլոդ Մութաֆյանը:
Նրա խոսքով, արհամարհական վերաբերմունքը միայն կառավարության կողմից էր, իսկ ֆրանսիացիները մեծ բավականությամբ են եկել ցուցադրություններին: «Հայերիս համար մեծ ձեռքբերում էր Ֆրանսիայում հայկական արվեստի գոհարների ցուցադրությունը: Այն բարձրացրեց հայ արվեստի գնահատականը»,-ավելացրեց Կ.Մութաֆյանը:
Շահեն Խաչատրյանն էլ նկատեց, որ Ֆրանսիայում չի ցուցադրվել այնպիսի նկարչի գործեր, ինչպիսին է Մինաս Ավետիսյանը: «Խորհրդային շրջանում` ձնհալից հետո` 1960-ականներին հայ արվեստին նոր շունչ տվեց հենց Մինասը, բայց նա չկար»,-ընդգծեց նա: