Ձեր վստահելի աղբյուրը

Եվրոպական Խորհրդի Մարդու Իրավունքների ոլորտի բոլոր պատասխանատուները ՀՀ մարդու իրավունքների պաշտպան Արմեն Հարությունյանի հետ Ստրասբուրգում կայացած հանդիպման ժամանակ մասնավորապես, դժգոհություն են հայտնել Եվրոպական կառույցների կողմից բարեփոխումների և խորհրդատվական բնույթի փորձագիտական առաջարկությունների կատարման ընթացքին իրենց տեղյակ չպահելու հանգամանքից: Խոսքը առաջին հերթին վերաբերել է այլընտրանքային ծառայության, հեռուստատեսության և ռադիոյի և Օմբուդսմանի մասին օրենքներին:

Վերջիններն արձանագրել են, որ դատական համակարգի վերջին բարեփոխումները անհրաժեշտ ազդեցություն չունեցան իրական անկախ դատական համակարգ ստեղծելու գործում և այս ոլորտում իրենց կողմից կատարված գործողությունները` կապված դատավորների վերապատրաստման և օրենսդրական բարեփոխումների հետ անհրաժեշտ արդյունք դեռևս չեն տվել: Ըստ նրանց, մեր երկրի դատական համակարգը, որպես իշխանության առանձին ճյուղ պետք է ունենա իրական անկախություն:

Անդրադառնալով ԶԼՄ-ների անկախությանը նրանք կրկին առաջ են քաշել հանրային հեռուստառադիոյի խորհրդի կազմավորման կարգը փոփոխելու անհրաժեշտության հարցը: Մասնավորապես առաջարկել են հետևյալ մեխանիզմը: Ազգային Ժողովը և Հանրապետության Նախագահը պետք է հանձնաժողովի անդամներին նշանակեն ՀԿ-ների և ԶԼՄ-ների կողմից ներկայացված թեկնածուների կազմից: Քանի որ առաջադեմ եվրոպական երկրներում` թե օրենսդրորեն, թե փաստացի, հիմնական անկախ այլընտրանքային հեռուստակայանը հանդիսանում է Հանրայինը, ապա պետք է ձեռնարկել բոլոր հնարավոր միջոցները տվյալ ոլորտը կարգավորելու համար:

Դժգոհություններից մեկն էլ այն է եղել, որ ոլորտի հայաստանյան պատասխանատուները Եվրախորհրդին չեն տեղեկացրել այլընտրանքային քաղաքացիական ծառայության վերաբերյալ նրանց կողմից ներկայացված առաջարկությունների մասին:

Մեկ անգամ ևս իրենց մտահոգությունն են հայտնել խոշտանգումների և անմարդկային վերաբերմունքի փաստերի շուրջ:

Մարդու Իրավունքների ոլորտի բոլոր պատասխանատուները փաստել են, որ Հայաստանում մեծ ջանքեր են գործադրվել օրենսդրական ոլորտը բարեփոխելու ուղղությամբ և այս առումով բավականին մեծ հաջողություններ կան: Սակայն հասարակական պրակտիկայի և օրենքների կիրառման առումով, ըստ Եվրոպական գործընկերների դիտարկումների լուրջ բացթողումներ կան, ինչի վկայությունն է նաև Մարդու Իրավունքների Եվրոպական Դատարան հասցեագրված դիմումների քանակի աճը: