Ձեր վստահելի աղբյուրը

ՀՀ մարդու իրավունքների պաշտպան Արմեն Հարությունյանը հոկտեմբերի 17-19-ը Ստրասբուրգում Եվրախորհրդի Մարդու իրավունքների գլխավոր Հանձնակատար Թոմաս Համերբերգի հետ քննարկվել է Համերբերգի վերջերս Հայաստան կատարած այցի արդյունքները:

Հանձնակատարը մեկ անգամ ևս նշել է Հայաստանում դեռևս օրակարգային համարվող հիմնահարցերը: Ըստ Պաշտպանի տեղեկատվության և հասարակայնության հետ կապերի բաժնի տեղեկատվության, պարոն Համերբերգը, մասնավորապես նշել է` այլընտրանքային ծառայության հետ կապված խնդիրները, ազատազրկման վայրերում խոշտանգումների և անառողջ վերաբերմունքի վերացմանն ուղղված գործողությունների արդյունավետության պակասը, ԶԼՄ-ների ոլորտում այլընտրանքային հեռուստակայանների անհրաժեշտության ինչպես նաև դատական համակարգի անկախության աստիճանի բարձրացման հարցը:

Արմեն Հարությունյանն ու Եվրոպական Դատարանի Նախագահ Ժան-Պոլ Կոստան  էլ հանդիպման ընթացքում քննարկել են Եվրոպական Դատարան հասցեագրված գործերի ընդհանուր բնույթը: Հաշվի առնելով այն հանգամանքը, որ ինչպես Հայաստանի Հանրապետությունից, այնպես էլ մյուս անդամ երկրներից Եվրոպական դատարան հասցեագրված գործերի քանակը սրընթաց աճում է, պարոն Կոստան կարևորագույն օրակարգային հարց է համարել մարդու իրավունքների պաշտպանության արտադատական մարմինների ամրապնդումը և գործառույթների ընդլայնումը ազգային մակարդակներով: Այս առումով Կոստան կարևորել է ազգային Օմբուդսմանի հետ համագործակցության նոր որակի անցնելու անհրաժեշտությունը:

Ի թիվս այլ հարցերի Վենետիկի Հանձնաժողովի Սահմանադրական Արդարադատության բաժնի ղեկավար` Ռուդոլֆ Շնութս Դուռռի հետ ՀՀ Օմբուդսմանի հանդիպման ժամանակ քննարկվել է ՀՀ քր. օր.-ի 301 հոդվածի վերաբերյալ Պաշտպանի կողմից ներկայացված հարցումը: Պարոն Դուռռը նշել է, որ Պաշտպանի կողմից ներկայացված փաստաթուղթը դրվել է շրջանառության մեջ: Հոդվածի վերաբերյալ իրենց կարծիքի պաշտոնական առձանագրությունը կներկայացվի դեկտեմբերի 14-15-ին կայանալիք նիստին:

Արմեն Հարությունյանը հանդիպում է ունեցել նաև ԱԳՈ-ի խմբի համանախագահ դեսպան Սյոգղենի հետ: Նրա հետ քննարկել են օրենսդրական բարեփոխումների ընթացքը: Դրական գնահատելով ընտրական օրենսգրքում կատարված փոփոխությունները, դեսպանը հիմնական խնդիրների շարքում հատուկ ընդգծել է դատական համակարգի և այլընտրանքային հեռուստատեսության հետ կապված հիմնահարցերը: Ընդգծելով հանրային հեռուստառադիո ընկերության խորհրդի կարևոր դերակատարությումը, պարոն Սյոգղենը նշել է Խորհրդի ձևավորման օրենսդրական մեխանիզմների բարելավման, ինչպես նաև լրագրողների հատուկ վերապատրաստման անհրաժեշտության մասին:

Իսկ դատական համակարգի առումով պարոն Սյոգղենն ընդգծել է դատական համակարգի և ընդհանրապես իրավակիրառ պրակտիկայում իրենց կողմից դիտարկված թերացումների մասին:

Խոշտանգումների և Անմարդկային վերաբերմունքի Եվրոպական Հանձնաժողովի համանախագահ Յոհան Ֆրիշդեթն էլ դրական է գնահատել Հայաստանում վարչական կալանքի վերացման փաստը: Յոհանը, մասնավորապես նշել է, որ իրենց կողմից պատրաստվել է 2006 թ-ի զեկույց` երկրում խոշտանգումների և անմարդկային վերաբերմունքի վերաբերյալ և մտահոգություն է հայտնել, որ նշված զեկույցի հրապարակման համար անհրաժեշտ է հայկական կողմի թույլտվությունը, որն իրենք դեռևս չեն կարողանում ստանալ և հույս է հայտնել, որ շուտով կոմիտեն կստանա այն: