Ձեր վստահելի աղբյուրը

Այս տարի էլ, ինչպես միշտ, ապօրինի ծառահատումնրը կշարունակվեն, քանի որ ցրտերը նոր է սկսվում: Panorama.am-ի թղթակցի հետ զրույցում իր մտահոգությունը հայտնեց «Հայասատանի անտառներ» ՀԿ-ի նախագահ Նազելի Վարդանյանը:

«Ես կարծում եմ, որ այս տարի ապօրինի ծառահատումները քիչ կլինեն, քանի որ հիմնականում գյուղերը գազաֆիկացված են»,-կարծիք հայտնեց նա: ՀԿ-ի ղեկավարի համոզմամբ, ծառահատումները տարեցտարի նվազում են, բայց «միևնույն է, եղածն էլ մեծ վնաս է հասցնում պետությանը»: Կազմակերպության տվյալներով, անցյալ տարի գրանցվել է 400-500 հազար խմ ծավալի ապօրինի ծառահատում, իսկ 2003-ին այդ ցուցանիշը կազմում էր 800 հազար խմ:

Նշենք, որ սանիտարական հատումները տարեկան թույլատրվում է իրականացնել 60-70 հազար խմ-ի սահմաններում: «Հայանտառ» ՊՈԱԿ-ի փոխտնօրենի Ռուբեն Պետրոսյանի խոսքով, այս տարի նախատեսված էր իրականացնել 52 խմ սանիտարական ծատահատում: Այդ աշխատանքներն այժմ ընթացքում են: Կազմակերպության տվյալներով, 2006 թվականի նոյեմբերից մինչև այս տարվա հունիսը ապօրինի հատվել է 1264 ծառ` 1325.39 խմ ծավալով: «Հատված ծառերի համար սահմանվել է տուգանք, կախված դրանց քանակից և տրամագծից»,- հավելեց Ռ.Պետրոսյանը: Ի դեպ, Ն. Վարդանյանի խոսքով, իրենց ՀԿ-ն առաջարկել է բնապահպանության նախարարությանը, որ տասը տարի շարունակ Հայաստանում ոչ մի տեսակի ծառահատում չիրականացվի, «սակայն իմ առաջարկը չի ընդունվել»:

«Ես նաև առաջարկել եմ, որ արտահանվող փայտանյութի համար վճարվի և' մաքսատուրք, և' ավելացված արժեքի հարկ, քանի որ ներկրողը փայտի համար այդ բոլոր հարկերը վճարում է, հակառակ դեպքում ներկրողին ձեռնատու չի լինի ներմուծելը: Ըստ նրա, այդ հարկերից ազատված լինելը մեծածավալ ապօրինի հատումների պատճառներից մեկն է: «Մենք պետք է ամեն ինչ անենք, որպեսզի խթանենք փայտանյութի ներմուծումը»,-ասաց ՀԿ-ի նախագահը: