Ձեր վստահելի աղբյուրը

ՀՀ Մարդու իրավունքների Պաշտպանի հանձնարարությամբ, աշխատակազմի ներկայացուցիչներն այցելել են Արարատի մարզի Վազգեն Սարգսյանի անվան զորամաս, ընդհանուր պայմաններին և զինվորների առօրյա խնդիրներին ծանոթանալու նպատակով:

Ինչպես հայտնում են Պաշտպանի գրասենյակից, զորամասի հրամանատարի տեղակալի հետ քննարկել են զինծառայության ընթացքում զինծառայողների մոտ առաջացող հիմնական խնդիրների, զինծառայողների փոխհարաբերությունների, ինչպես նաև զինվորական պարտականությունները կատարելու հետ կապված խնդիրներ:

Քննարկումների ընթացքում նշվել է, որ վերջին շրջանում զորակոչված զինվորների կրթական մակարդակը ցածր է, ըստ պետի տեղակալի, լրացուցիչ դասընթացներ են կազմակերպվում ուսումը վերականգնելու նպատակով: Զորամասի հրամանատարի տեղակալի ուղեկցությամբ աշխատանքային խումբն այցելել է զորանոցներ, ճաշարան բուժմաս:

Ըստ պաշտպանի գրասենյակի ներկայացուցիչների,  «զորանոցները տիպային էին, կահավորված, զինվորների համար նախատեսված բոլոր հարմարություններով, պատերին փակցված էին պաստառներ կանոնակարգի կանոների, զինվորների իրավունքների և պարտականությունների մասին նշումներով: Զորամասի բակը և զորանոցները գտնվում էին բավականին բարվոք և մաքուր վիճակում»:

Աշխատանքային խումբը ճաշարան այցելել է ճաշի ժամին: Զինվորների հետ ունեցած զրույցի ընթացքում տեղեկացել են, որ ճաշացանկի և դրանց որակի վերաբերյալ զինվորները գանգատներ չունեն: Սննդամթերքը որակյալ է, որը համտեսել են նաև աշխատանքային խմբի անդամները և ըստ վերջիններիս դիտարկումների այն համապատասխանում էր տվյալ օրվա համար նախատեսված ճաշացանկին:

Վատթար վիճակում է եղել բուժմասը, չեն եղել բուժում ստանալու համար մինիմալ պայմաններ: Բուժ. մասում այդ պահի դրությամբ բուժում է ստանում 6 զինվոր: Բուժ մասը չի ունեցել համապատասխան գույք և բացի այդ խիտ էր բնակեցված:

Ըստ հրամանատարի տեղակալի 2008թ.-ի բյուջեով արդեն գումարները հատկացված են և նախատեսված է նոր բուժ շենքի կառուցում: Նշվել է նաև, որ նոր շենքում նախատեսված է նոր սարքավորումներ տեղադրել: Տվյալ պահի դրությամբ սուր վարակիչ հիվանդությամբ բուժում ստացող հիվանդ չի եղել: Բուժմասը ժամկետանց դեղորայք չի ունեցել: Դեղատան պետի հավաստմամբ չունեն նաև դեղորայքի պակաս:

ՀՀ Մարդու իրավունքների պաշտպանի աշխատակիցները հրամանատարի տեղակալի հետ այցելել են նաև դիրքեր` հերթապահություն կատարող զինվորների և կացարաններում պահման պայմաններին ծանոթանալու համար: Զինվորները գոհ են եղել  դիրքերում իրենց ծառայությունից, ըստ աշխատանքային խմբի դիտարկման բոլոր պայմանները ապահովված են եղել նորմալ ծառայութուն իրականացնելու համար: Կացարանները տաք էին, սնունդը նորմալ և ամենակարևորը, ըստ հարցումների, զինվորները սնունդը ստանում են ժամանակին:

Մարդու իրավունքների պաշտպանի ներկայացուցիչների կողմից զինվորների համար նախատեսված պայմանները արձանագրվել են բավարար, թեպետ այցելության մասին նախապես չէր զգուշացվել: