ՏՈՒՅԺ ՉԻ ՀԱՅՏԱՐԱՐՎԵԼ Ո'Չ Ժ.ՍԵՖԻԼՅԱՆԻՆ, Ո'Չ ԷԼ Վ. ՄԱԼԽԱՍՅԱՆԻՆ

Իրավունք 17:31 31/10/2007

ՏՈՒՅԺ ՉԻ ՀԱՅՏԱՐԱՐՎԵԼ Ո'Չ Ժ.ՍԵՖԻԼՅԱՆԻՆ, Ո'Չ ԷԼ Վ. ՄԱԼԽԱՍՅԱՆԻՆ

Ժիրայր Սե‎ֆիլյանի եւ Վարդան Մալխասյանի զորակցության կոմիտեն հայտարարել էր, որ երկուշաբթի օրը «Վարդաշեն» քրեակատարողական հիմնարկում տեղի է ունեցել աննախադեպ խուզարկություն: Ըստ նրանց, «Արդարադատության նախարարության կալանավայրերի վարչության անվտանգության բաժինը, բաժնի պետ Վարուժան Եղիազարյանի գլխավորությամբ, խուզարկության են ենթարկել «Վարդաշեն»ՔԿՀ բանտախցերը»:

Նրանց տեղեկություններով, այդ հիմնարկում նման խոշոր մասշտաբով խուզարկություն երբևէ չի անցկացվել: Զորակցության կոմիտեի պնդմամբ միակ լուրջ խուզարկությունն իրականացվել է Ժիրայր Սէ‎ֆիլյանի և Վարդան Մալխասյանի կացարանում: Վերջինները ենթադրում են, որ տեղի ունեցածը հատուկ է կազմակերպված և նպատակը Վարդան Մալխասյանին տույժ հայտարարելն է ու երկրորդ տույժը Ժիրայր Սէ‎ֆիլյանին, որպեսզի նրանց գործերը չներկայացվեն պայմանական վաղաժամկետ ազատման հարցը քննող հանձնաժողովին:

«Հաղորդագրության մեջ տեղ գտած տեղեկատվությունն աբողջությամբ խեղաթյուրված է»,-ասված է ՀՀ ԱՆ Քրեակատարողական վարչության մամուլի քարտուղար Արսեն Բաբայանի այսօր տարածած հաղորդագրության մեջ: «Հայաստանի Հանրապետության արդարադատության նախարարության քրեակատարողական վարչության կողմից նախապես սահմանված հատուկ միջոցառումների օրակարգի համաձայն, սույն թվականի հոկտեմբերի 29-ին, քրակատարողական վարչության կողմից «Վարդաշեն» քրեակատարողական հիմնարկում գտնվող բացառապես բոլոր դատապարտյալները ենթարկվել են խուզարկության, որին մասնակցել են միայն քրեակատարողական ծառայության աշխատակիցները: Նշված միջոցառումները, այսպիսով, եզակի բնույթ չեն կրում և բնավ անձնավորված չեն: Դրանք իրականացվում են ընդհանուր հիմունքներով և բխում են Հայաստանի Հանրապետության քրեակատարողական օրենսգրքից»,-ասված է հաղորդագրության մեջ:

ԱՆ ՔՀՎ-ից նաև հայտնում են, որ հիշյալ միջոցառման արդյունքում դատապարտյալներ Ժիրայր Սեֆիլյանի և Վարդան Մալխասյանի մոտ հայտնաբերվել է քաղաքացիական համազգեստ, ինչն արգելված է կանոնակարգով: Հայտնվում է նաև, որ քրեակատարողական վարչությունը ոչ միայն վերը նշված, այլև այլ դատապարտյալների նկատմամբ որևէ կարգապահական տույժ չի կիրառել և բավարարվել է թերությունները վերացնելու վերաբերյալ իրականացված բացատրական աշխատանքով: Բացի այդ, որևէ հայտարություն չի արվել այն մասին, թե իբր վերը նշված անձանց հետ նույն բանտախցում գտնվող թվով 5 դատապարտյալների պետք է նկատողություն հայտարարվի:

ԱՆ ՔՀՎ-ից նաև տեղեկացնում են, որ խուզարկություններ իրականացվել ու իրականացվում են առանց որևէ բացառության բոլոր քրեակատարողական հիմնարկներում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: