Ձեր վստահելի աղբյուրը

Այս տարվա հունվար-սեպտեմբեր ամիսների ընթացքում պետական բյուջեի եկամուտները կազմել են շուրջ 386.6 մլրդ դրամ, իսկ ծախսերը` 379.9 մլրդ դրամ: Ինչպես հայտնեցին ֆինանսների և էկոնոմիկայի նախարարությունից, այդպիսով ապահովվել է կառավարության կողմից հաստատված իննամսյա ծրագրի համապատասխանաբար 101 և 87.3 տոկոսը, իսկ տարեկան ծրագրի` համապատասխանաբար 72.3 և 65.8 տոկոսը:
Նույն աղբյուրի տվյալներով, նախորդ տարվա նույն ժամանակահատվածի համեմատ պետական բյուջեի եկամուտներն ավելացել են 26.9%-ով կամ շուրջ 82 մլրդ դրամով: Ծախսերն ավելացել են 20.4%-ով կամ շուրջ 64.3 մլրդ դրամով: Աճը հիմնականում պայմանավորված է ծառայությունների ձեռք բերման ծախսերի, կապիտալ ծախսերի և տրանսֆերտների աճով:

Եկամուտների մասով 75.9 մլրդ դրամով ավելացել են հարկերը և տուրքերը, շուրջ 5.4 մլրդ դրամով` ոչ հարկային եկամուտները, 3.8 մլրդ դրամով` կապիտալի գործառնություններից եկամուտները, իսկ պաշտոնական տրանսֆերտների գծով արձանագրվել է անկում 3.2 մլրդ դրամով: Անցած ժամանակահատվածում պետական բյուջեի եկամուտների 84.5%-ը ձևավորվել է հարկային մուտքերի հաշվին:
Նշենք, որ այս ընթացքում պետական բյուջեի հարկային եկամուտները կազմել են շուրջ 326.7 մլրդ դրամ և 100.1%-ով ապահովել իննամսյա ծրագիրը: Նախորդ տարվա նույն ժամանակահատվածի համեմատ հարկային եկամուտներն աճել են 29.3%-ով: Պետական բյուջեի ոչ հարկային եկամուտները 2007 թվականի հունվար-սեպտեմբեր ամիսներին կազմել են ավելի քան 28.7 մլրդ դրամ` 42.7%-ով գերազանցելով իննամսյա ծրագրային ցուցանիշը և 23.1%-ով (5.4 մլրդ դրամով)` նախորդ տարվա նույն ցուցանիշը: Կապիտալի գործառնություններից պետական բյուջեի եկամուտները կազմել են շուրջ 13.7 մլրդ դրամ: Հաշվետու ժամանակահատվածում պետական բյուջե են մուտքագրվել ավելի քան 1.3 մլրդ դրամ պաշտոնական տրանսֆերտներ:

2007 թվականի հունվար-սեպտեմբեր ամիսներին պետբյուջեի միջոցների հաշվին կատարվել են 379.9 մլրդ դրամի ծախսեր: Տրամադրված միջոցների 74.6%-ն ուղղվել է ընթացիկ, 21.5%-ը` կապիտալ ծախսերի ֆինանսավորմանը, 3.9%-ը` զուտ վարկավորմանը: Ընթացիկ ծախսերի ֆինանսավորմանը հաշվետու ժամանակահատվածում հատկացվել է 283.4 մլրդ դրամ` ապահովելով իննամսյա ծրագրի 90.3% կատարողական: Ընթացիկ ծախսերի Կառավարության կողմից սահմանված տարեկան ծրագիրը կատարվել է 66.3%-ով: