Ձեր վստահելի աղբյուրը

Օմբուդսմանի հանձնարարությամբ գրասենյակից աշխատանքային խումբ է այցելել «Վանաձոր» քրեակատարողական հիմնարկ: Այս այցի համար, ըստ Պաշտպանի գրասենյակի տեղեկատվության, հիմք է ընդունվել մամուլում հրապարակված տեղեկատվությունն այն մասին, որ ՀՀ ԱՆ «Վանաձոր» ՔԿՀ դատապարտյալ Արմեն Ենգոյանը շարունակում է հացադուլը և դիմել է ՀՀ Մարդու իրավունքների պաշտպանին և գխավոր դատախազին:

Աշխատանքային խումբը հանդիպել և առանձնազրույց է ունեցել Ա. Ենգոյանի հետ: Դատապարտյալը հերքել է այն տեղեկատվությունը, որ հացադուլի պատճառը` իրեն փակ ուղղիչ հիմնարկից կիսափակ տիպի հիմնարկ տեղափոխելն է: Ըստ Ա. Ենգոյանի, հացադուլի բուն պատճառը դատապարտյալների հիվանդանոցում տիրող իրավիճակն է, որտեղ նա գտնվել է 2005-2006թ.թ.:

Աշխատանքային խումբը հանդիպել է նաև հիմնարկի պետ Շ. Ալչանգյանին, որը տեղեկացրել է, որ դատապարտյալ Ա. Ենգոյանի կողմից բարձրացված հարցերի վերաբերյալ կատարվել է ծառայողական քննություն, որի արդյունքում պարզվել է, որ ներկայացված փաստերը իրաանությանը չեն համապատասխանում: Ա. Ենգոյանը հրաժարվել է ծանոթանալ ծառողական քննության արդյունքներին, որի վերաբերյալ ՔԿՀ-ում կազմվել է համապատասխան արձանագրություն:

Պաշտպանի ներկայացուցիչների կողմից ուսումնասիրվել է ծառայողական քննության արդյունքները, որից պարզ է դարձել, որ դատապարտյալի մատնանշած անձինք, որոնք ըստ իրեն կարող էին վկայել իր հայտնածի իսկությունը, նույնպես քննությամբ վերջիններիս կողմից հերքվել է:

Ա. Ենգոյանի առողճական վիճակը բավարար էր և նա գտնվում էր բժիշկների հսկողության տակ: Նրան ներկայացվել է իր իրավունքները և պարտականությունները, ինչպես նաև բացատրվել անհամաձայնություններ ունենալու դեպքում բողոքարկման կարգը: Վերջինը խոստացել է դադարեցնել հացադուլը: Ա. Ենգոյանը նշել է նաև, որ օգտվում է իր զբոսանքի և հեռախոսակապի իրավունքից: