Ձեր վստահելի աղբյուրը

Ներկայացնում ենք  «Հանրապետական» կուսակցության 11-րդ համագումարից հետո ՀՀԿ նորընտիր նախագահ Սերժ ՍԱՐԳՍՅԱՆԻ`  լրագրողներին տրված պատասխանները:

 -Պարոն վարչապետ, դուք ասացիք, թե ընդդիմադիրների կողմից յուրաքանչյուր փորձ կանխվելու է, ի՞նչ նկատի ունեիք:
- Ես առաջին հերթին նկատի ունեի քաղաքական կողմը: Թե չէ, ինչպես դուք եք ասում, եթե նրանք փորձեն բռնություններ անել, ապա դրա համար կան իրավապահ մարմիններ, որոնք կզբաղվեն նրանցով:

- Պարոն վարչապետ, վերջերս հնչած տարբեր կարծիքների ֆոնի վրա դուք տեսնո՞ւմ եք գունավոր հեղափոխությունների հավանականություն Հայաստանում:
- Ես նույնիսկ մի քանի տարի առաջ եմ հայտարարել, որ էդպիսի բան Հայաստանում բացառվում է: Մենք վաղուց մեր բոլոր հեղափոխություններն արել ենք:

- Առաջիկա նախագահական ընտրություններում դուք ձեզ մրցակից չե՞ք տեսնում:
- Գիտեք, ես միշտ ասել եմ, որ նախագահական ընտրությունները հնարավորություն են, այլ ոչ թե սպորտային միջոցառումներ: Ես որևէ մեկին մրցակից չեմ համարում: Ես համարում եմ, որ մենք պետք է մեր ունակություններն ի ցույց դնենք մեր ընտրողներին, մեր ժողովրդին, այլ ոչ թե պայքարենք որևէ մեկի դեմ: Ինչ-որ բանի դեմ կարելի է պայքարել և անհրաժեշտ է պայքարել, այն պրոբլեմների, որ խոչընդոտում են մեր զարգացումը, բայց որևէ մեկի դեմ պայքարելը չեմ համարում ճիշտ քաղաքականություն:


- Պրն. Սարգսյան, Լոս Անջելես Թայմսին տված ձեր հարցազրույցն ինչպես որ մեկնաբանվում է, ինչ որ բան կարո՞ղ եք ասել այդ մասին: Որքանո՞վ է դա համապատասխանում իրականությանը:
- Ես ինչ որ ասելու էի, ասել եմ Լոս Անջելես Թայմսի խմբարկակազմի հետ ունեցած հանդիպման ժամանակ, և ասել եմ ողջ ճշմարտությունը, ինչ ասել եմ, իմ ասածի տերն եմ, և եթե որևէ մեկն ուզում է այնտեղ ինչ որ բան գտնել, շատ պետք է չարչարվի: Այն, ինչ որ հիմա փորձում են ներկայացնել հանրությանը, տարրական չիմացության արդյունք է: Փորձում են ներկայացնել, իբր թե ես ասել եմ Ղարաբաղի խնդիրը կրոնական հիմք ունի և մենք կրոնների պատերազմ ենք մղում: Դա զավեշտական է, որովհետև ես երբեք այդպես ոչ մտածել եմ, նամանավանդ ոչ էլ արտահայտվել: Ես ուղղակի ասել եմ, որ, այո, այս պայքարում, կրոնական գործոնը տեղ ունի: Միշտ եմ ասել, ես սա առաջին անգամ չեմ ասել: Եթե տեղ չունի, ապա ինչո՞ւ են ոչնչացվում մեր պատմական հուշարձանները, ինչո՞ւ են ոչնչացվում խաչքարները, և եթե տեղ չունի, ապա ինչո՞ւ են հայ լինելու համար մարդկանց սպանել, եթե տեղ չունի, ապա ինչո՞ւ են հայ լինելու համար մարդկանց խարույկների վրա վառել: Եվ ընդ որում, ոչ միայն նախորդ դարասկզբին, այլ նաև նախորդ դարավերջին: Անշուշտ, եթե որևէ մեկը հայտարարում է, որ այստեղ, կրոնական պատկանելությունը, հավատամքը տեղ չունի, դա իր խնդիրն է: Բայց իր բարդույթը, իր պրոբլեմը նա չպիտի փորձի իմ վզին փաթաթել:

- Ինչպիսի՞ն է այսօր ձեր թիմը:
- Ուժեղ: Մեր թիմը հավատում է գաղափարին: Գիտեք, անձնական հավատարմությունը երկրորդական ենք համարում: Անձնական հավատարմությունը մեծ նշանակություն ունի ընտանեկան, ընկերական հարաբերություններում, բայց քաղաքականության մեջ կարեւոր է, որ մարդ իր կաշին չփոխի, որ մարդ չփորձի մշտապես իր անբարոյական քայլերը արդարացնի` ասելով, թե քաղաքականությունն անբարոյականություն է: Ես չեմ համարում, որ մարդ կարող է քաղաքականության մեջ լինել անբարոյական, իսկ կենցաղում` բարոյական: Այդպիսի բան չի լինում: Այո, մեր թիմն ուժեղ է, ուժեղ է իր գաղափարներով, ուժեղ է իր անցած ճանապարհով: Բայց մեր թիմի ուժը նա է, որ ունի շատ լավ պատկերացում, թե ինչպիսի երկիր կարելի է դարձնել Հայաստանը, և մենք այդպես վարվելու ենք:

- Ձեր տեսակետը Ռոբերտ Քոչարյանին վարչապետ նշանակելու առնչությամբ փոխվե՞լ է:
- Ես դիրքորոշում չեմ արտահայտել: Ես համարում եմ, որ ճիշտ չէ, որ գործող վարչապետը մեկնաբանի նախագահի ապագայի հետ կապված խնդիրները: 

- Պարոն Սարգսյան, առնետավազքի մասին է այսօր շատ խոսվում: Հնարավո՞ր է, որ իշխանական ճամբարից գնան ընդդիմադիր ճամբար:
- Գիտեք, մենք իշխանական բացարձակ մեծամասնություն ենք, էլ ի՞նչ վազք է մեզ պետք:
- Չէ, խոսքը ձեր մոտից կատարվող առնետավազքի մասին է
- Ա~, մտքովս անգամ չի անցնում (ժպտալով):