Ձեր վստահելի աղբյուրը

Այսօր Շաքարային դիաբետի դեմ պայքարի միջազգային օր է: Այս տարի այն կենտրոնացված է երեխաների ու դեռահասների խնդիների վրա և ունի «Դիաբետը երեխաների և դեռահասների մոտ» խորագիրը:
Այսօր հանրապետությունում հաշվառված է 37.1 հազար առաջին տիպի` ինսուլինակախյալ և երկրորդ տիպի` դեղորայքով ապրող 30 հազարից ավելի հիվանդ: Այս մասին Panorama.am-ի թղթակցի հետ զրույցի ժամանակ ասաց առողջապահության նախարարի խորհրդական Ռուսլանա Գևորգյանը:

Նրա հավաստմամբ, երկրորդ տիպի շաքարախտով հիվանդներից 12 հազարը բնակվում է Երևանում, իսկ 19 հազարը` մարզերում: Շաքարային դիաբետով ախտորոշված երեխաների թիվը հասնում է 582-ի, որոնցից 497-ն առաջին տիպի են, իսկ 85` երկրորդ: Ոչ շաքարային դիաբետ հվանդությամբ հանրապետությունում հաշվառված է 200 հիվանդ: Այս հիվանդների համար նախատեսված «Դեզմոպրեսիլ» դեղորայքը տրամադրում է նախարարությունը՝ անվճար հիմունքով: «Կառավարությունն այս տարի կենտրոնացված գնումներով 1մլրդ 416մլն 300 հազար դրամի դեղորայք է գնել, որից 541 հազար 18 դրամը տրամադրվելու է շաքարախտով հիվանդներին դեղորայքով ապահովելու համար»,-ասաց Ռ. Գևորգյանը: Բացի այս, նրա խոսքով, գումարից 1մլրդ 362 հազարը տրամադրվում է պոլիկլինիկաներին, որպեսզի կենտրոնացված դիմումներով դեղորայքի ուշանալու դեքպում, այն օգտագործվի համապատասխան դեղորայք գնելու և հիվանդին տրամադրելու համար: Մասնագետի հավաստմամբ, շաքարային դիաբետը երեխաների մոտ հանդիպող ամենատարածված խրոնիկական հիվանդությունն է: Նշենք, որ Դիաբետի միջազգային կոմիտեի տվյալներով` յուրաքանչյուր տարի մինչև 15 տարեկան շուրջ 70 հազար երեխայի մոտ ախտորոշվում է 1-ին կարգի դիաբետ: Առողջապահության համաշխարհային կազմակերպության տվյալներով, ամբողջ աշխարհում շուրջ 180 մլն մարդ տառապում է այս հիվանդությամբ:

Ավելացնենք, որ շաքարային դիաբետից 2005 թ-ին աշխարհում մահացել է 1.1 մլն մարդ: Մահերի մեծ մասը գրանցվում է մինչև 70 տարեկանների շրջանում, որոնց 55 տոկոսը կանայք են: ԱՀԿ կանխատեսումներով, եթե հաջորդ 10 տարիների ընթացքում այս հիվանդության դեմ պայքարի համապատասխան քայլեր չձեռնարկվեն, մահերի թիվը կաճի շուրջ 50 տոկոսով: