Ձեր վստահելի աղբյուրը

«Որոշում է կայացվել տնտեսական դաշտում թռիչք կատարել, որի արդյունքում 2007թ. բյուջեի 1,6 միլիարդի դոլարի փոխարեն կունենանք 2,5 միլիարդ դոլար և այդ միտումը կշարունակվի նաև 2009 և 2010 թվականներին»,- այս մասին այսօր լրագրողների հետ հանդիպման ժամանակ հայտարարեց Հանրապետական խմբակցության անդամ, Գեղարքունիքի մարզից ընտրված գործարար պատգամավոր Հակոբ ՀԱԿՈԲՅԱՆՆ ու հավելեց, որ տնտեսական բազայի մեծացումը կտարածվի բոլոր ոլորտների վրա: Անդրադառնալով աշխատավարձերի ու թոշակների բարձրացմանը զուգահեռ գների բարձրացման խնդրին,, նա նշեց, որ դրա պատասխանատուն առաջին հերթին Կենտրոնական Բանկն է, ինչպես նաև տնտեսական մրցակցության ու հանրային ծառայությունները կարգավորող հանձնաժողովները, որոնք պարտավոր են հետևել գների փոփոխություններին:

«Աշխատավարձերի ու թոշակների բարձրացումը կոմպենսացնում է գների բարձրացումը»,- հայտարարեց հանրապետական Հ. Հակոբյանը:

Հարցին, թե ինչո՞ւ կառավարությունը թոշակների ու աշխատավարձերի բարձրացման մասին խոսելիս, չի նշում, թե այդ բարձրացումից որքա՞նն է գնալու գների բարձրացման կոմպենսացմանը և որքանն է իրականում դրականորեն ազդելու մարդկանց կենսամակարդակի վրա, Հ. Հակոբյանն ասաց. «Կառավարությունը պետք է ունենա պաշտոնական տվյալներ, որպեսզի այդ հարցին պատասխան տա: Քանի դեռ գների բարձրացման փաստը չի եկել, ոչ ոք էլ այդ հաշվարկներին ու թվերին տիրապետել չի կարող: Օդի մեջ թվաբանություն չի լինում»:

Իսկ հնարավո՞ր է, փաստը գա և ստացվի, որ գներն ավելի շատ են բարձրացել, քան մարդկանց աշխատավարձերն ու թոշակները հարցին էլ պատասխանեց. «Եթե վաղը նավթը թանկանա երկու անգամ, հացը չորս անգամ, կստացվի, որ մեր ավելացրած թոշակը հերիք չի անում գների թանկացումը կոմպենսացնելու համար»: