Ձեր վստահելի աղբյուրը

Այսօր ֆինանսների և էկոնոմիկայի նախարարությունը տարածել է այս տարվա առաջին տասը ամիսների ընթացքում պետական բյուջեի կատարման ամփոփ բնութագիրը: Ըստ հաղորդագրության, այդ ընթացքում պետբյուջեի եկամուտները կազմել են ավելի քան 442.9 մլրդ դրամ, իսկ ծախսերը` 437.8 մլրդ դրամ, որոնք համապատասխանաբար 82.4%-ով և 75.7%-ով ապահովել են տարեկան ծրագրային ցուցանիշները:

Նախորդ տարվա նույն ժամանակահատվածի համեմատ պետական բյուջեի եկամուտներն ավելացել են 28.2%-ով կամ ավելի քան 97.3 մլրդ դրամով: Ընդ որում, 92.4 մլրդ դրամով ավելացել են հարկերը և տուրքերը, շուրջ 5.5 մլրդ դրամով` ոչ հարկային եկամուտները, 2.6 մլրդ դրամով` կապիտալի գործառնություններից եկամուտները, իսկ պաշտոնական տրանսֆերտների գծով արձանագրվել է անկում 3.2 մլրդ դրամով: Հաշվետու ժամանակահատվածում բյուջե են մուտքագրվել ավելի քան 1.3 մլրդ դրամ պաշտոնական տրանսֆերտներ` կազմելով տարեկան ծրագրի 18.4%-ը:
Պետական հիմնարկների արտաբյուջետային ֆոնդերի միջոցներից մուտքերը կազմել են ավելի քան 10.4 մլրդ դրամ` նախորդ տարվա 8.9 մլրդ դրամի դիմաց:
Նշված ժամանակահատվածում հարկային եկամուտները կազմել են ավելի քան 376.1 մլրդ դրամ և 80.6%-ով ապահովել տարեկան ծրագիրը: Նախորդ տարվա նույն ժամանակահատվածի համեմատ հարկային եկամուտներն աճել են 31.6%-ով: Ընդ որում, գրեթե բոլոր հարկատեսակների գծով արձանագրվել են աճի բարձր տեմպեր:

Նախորդ տարվա նույն ժամանակահատվածի համեմատ ոչ հարկային եկամուտների նվազում է նկատվել, մասնավորապես, տիրազուրկ, ժառանգության իրավունքով, ինչպես նաև ֆիզիկական և իրավաբանական անձանցից (բացառությամբ ՀՀ համայնքների, միջազգային կազմակերպությունների և օտարերկրյա պետությունների) նվիրատվության կարգով պետությանը որպես սեփականություն անցած դրամական միջոցներից, հիմնական միջոց կամ ոչ նյութական ակտիվ չհանդիսացող գույքի օտարումից մուտքերի գծով: Դրանք այս տարի ընդհանուր առմամբ կազմել են 54.4 մլն դրամ և ավելի քան 1 մլրդ դրամով զիջել նախորդ տարվա նույն ցուցանիշը: Վերջինս պայմանավորված է այն հանգամանքով, որ 2006 թվականի նույն ժամանակահատվածում ՎԶԵԲ «Զվարթնոց» բեռնային համալիրի վարկային ծրագրի սպասարկման նպատակով «Արմենիա» միջազգային օդանավակայաններ ՓԲԸ-ի կողմից ՀՀ կառավարությանը տրամադրվել էր 944.5 մլն դրամ նվիրատվություն:

Նշենք, որ այս ընթացքում պետբյուջեի միջոցների հաշվին կատարվել են 437.8 մլրդ դրամի ծախսեր` կազմելով տարեկան ծրագրի 75.7%-ը: Տրամադրված միջոցների 74%-ն ուղղվել է ընթացիկ, 22.1%-ը` կապիտալ ծախսերի ֆինանսավորմանը, 3.8%-ը` զուտ վարկավորմանը:
Նախորդ տարվա նույն ժամանակահատվածի համեմատ պետական բյուջեի ծախսերն ավելացել են 23.5%-ով կամ 83.4 մլրդ դրամով: Աճը հիմնականում պայմանավորված է ծառայությունների ձեռք բերման ծախսերի, կապիտալ ծախսերի և տրանսֆերտների աճով: