Ձեր վստահելի աղբյուրը

«Մարդու իրավունքների Եվրոպական դատարանի դերը մի կողմից բարձրանում և կարևորվում է, մյուս կողմից էլ սկսում է ավելի ու ավելի նվազել»,- ասում է Մարդու իրավունքների Եվրոպական դատարանում ՀՀ կառավարության ներկայացուցիչ Գևորգ Կոստանյանը: Այդ դատարանի դերն, ըստ Գ. Կոստանյանի նվազում է հաշվի առնելով այն հանգամանքը, որ եվրոպական դատարանում գործերի քննության տևողությունը երկարել է, շատ դեպքերում քաղաքացիներն այդ միջոցը չեն համարում արդյունավետ, քանի որ տևողության ժամկետը հասնում է 4-5 տարվա:

Մարդու իրավունքների Եվրոպական դատարանում ՀՀ կառավարության ներկայացուցչի խոսքով, հենց դրա համար էլ, ներպետական և միջազգային մակարդակով սուբյեկտները սկսում են որոնել այնպիսի միջոցներ, որոնք կապահովեն դեպի Եվրոպական դատարան դիմումների հոսքի կրճատումը, ինչն էլ իր հերթին կնպաստի գործերի քննության ժամկետի նվազմանը: Այս տեսանկյունից, Գ. Կոստանյանը, կարևորում է Մարդու իրավունքի պաշտպանի դերը և պատահական չի համարում, որ միջազգային բոլոր մակարդակներում այսօր քննարկվում է Մարդու իրավունքների պաշտպանի դերի բարձրացման և ավելի գործուն լիազորություններով նրան օժտելու հարցը:

«Իհարկե, միջազգային պրակտիկայում կան նաև մարդու իրավունքների պաշտպանության այլ միջոցներ, օրինակ` Մեծ Բրիտանիան 98 թվականի մարդու իրավունքների ակտով պարտավորեցրեց դատարաններին և պետական մարմիններին ուղղակիորեն կիրառել և իրենց գործերի լուծման ժամանակ հիմք ընդունել Եվրոպական դատարանի որոշումները: Այդ հանգամանքը լուրջ ազդեցություն ունեցավ և մոտ 40 % -ով կրճատեց քաղաքացիների կողմից ընդդեմ Մեծ Բրիտանիայի ներկայացվող հայցերի քանակը»,-նշեց Գ.Կոստանյանը:

Սա Կոստանյանը լուրջ ցուցանիշ է համարում, սակայն վստահ է, որ իրավական համակարգերը մեր նման պետություններում թույլ չեն տա այդպիսի մեթոդ կիրառել, որովհետև դատական նախադեպը որպես իրավունքի առանձին աղբյուր դեռևս լայն կիրառություն չունի: Հետևաբար, Մարդու իրավունքների Եվրոպական դատարանում ՀՀ կառավարության ներկայացուցիչը, պետության և քաղաքացիների միջև հարաբերությունների առումով որպես միջանկյալ լուծում շատ կարևորվում է ՄԻՊ-ի դերը:

«Հայաստանից Եվրոպական դատարանում յուրաքանչյուր դիմումի առկայությունը պետության հեղինակության վտանգման եղանակ է, ուստի հենց պետությունն էլ շահագրգռված է, որ առավելագույնս պաշտպանվեն իր քաղաքացու իրավունքներն ու շահերը»,-սա Եվրոպական դատարանում ՀՀ կառավարության ներկայացուցիչ, արդարադատության փոխնախարար Գևորգ Կոստանյանի համոզմունքն է:

Ամենաստորադաս օղակի, ամենաստորադաս աշխատողի գործողությունների կամ անգործության համար պատասխանատուն պետությունն է և յուրաքանչյուր նման աշխատողի համար պետությունը կարող է պարտություն կրել: Այս առումով, Գևորգ Կոստանյանը կարևորում է պետական մարմնի, յուրաքանչյուր քաղաքացու և փաստաբանների համահունչ աշխատանքը: «Այսօր շատ է խոսվում, որ Հայաստանը Եվրոպական դատարանում պարտվում է, այո, դե ֆակտո մենք տեսնում ենք, որ ակնհայտ պարտություն է, քանի որ ճանաչվում է այն փաստը, որ պետությունը խախտել է իր քաղաքացու այս կամ այն իրավունքը»,-ասում է ՀՀ կառավարության ներկայացուցիչը և ավելացնում, որ մենք չպետք է դա համարենք պարտություն, քանի որ յուրաքանչյուր նման վճիռ  ողորդում և ստիպում է, այսուհետ մեր իրավակիրառ պրակտիկան ձևավորել եվրոպական չափանիշերին համահունչ:

Նրա խոսքով, պետության պարտված դեպքերում օրենքներն ու իրավական համակարգերը իդեալական են եղել, պարտության պատճառը իրավակիրառության մեջ է եղել: