Ձեր վստահելի աղբյուրը

«Ռոյալ Արմենիա» ընկերության ղեկավարների քրեական գործով ավարտվեց նաև վերաքննիչ դատավարությունը: Այսօր դատավարությունից գոհ էին միայն մեղադրող դատախազները: Նշենք, որ այս դատարանը ընկերության ղեկավարների քրեական գործով հրապարակեց մեղադրական դատավճիռ: Ճիշտ այնպիսի պատժաչափերով, ինչպես մեղադրականում պահանջել էին դատախազները, այն է` 6 տարվա ազատազրկում ընկերության համասեփականատեր Գագիկ Հակոբյանի և 2 տարի ընկերության տնօրեն Արամ Ղազարյանի համար:

Վերաքննիչ դատարանը համարեց, որ Կենտրոն և Նորք-Մարաշ համայնքների առաջին ատյանի դատարանի (նախագահող դատավոր Պարգև Օհանյան, լիազորությունները դադարեցված են) պատճառաբանությունները չեն բխում գործի տվյալներից, անհիմն են, ամբաստանյալներին մեղսագրված արարքներն էլ լիովին ապացուցված են և ճիշտ են որակված: Հիշեցնենք, որ Կենտրոն և Նորք-Մարաշ համայնքների առաջին ատյանի դատարանն այս տարվա հուլիսի 16-ին «Ռոյալ Արմենիա» ընկերության ղեկավարների նկատմամբ հարուցված քրեական գործով կայացրել էր արդարացման դատավճիռ և ազատել դատարանի դահլիճից:

Ի դեպ, նշենք նաև, որ մինչ այդ մեղադրողները ընկերության ղեկավարների համար պահանջում էին 12 և 11 տարվա ազատազրկում: Սակայն 2-րդ ատյանի դատարանում, դատավարության վերջում, դատական այն նիստի ժամանակ, որին լրագրողներին արգելեցին մասնակցել` անակնկալ էր սպասվում. դատախազները հրաժարվեցին որոշ մեղադրանքներից և միջնորդեցին որոշ վերաորակումներ անել:

Դատավճռից հետո, ի պատասխան մեր հարցին, թե ինչպե՞ս պատահեց, որ 2-րդ ատյանում դատավարության վերջում մեղադրող կողմը հրաժարվեց մեղադրանքի որոշ մասերից, դատախազ Լևոն Մելքոնյանն ասաց, թե նոր հանգամանքներ էին ի հայտ եկել: Իսկ ինչո՞ւ դրանք ի հայտ չեկան առաջին ատյանում մեր հաջորդ հարցին էլ Լ. Մելքոնյանը պատասխանեց, թե գործը լիարժեք չէին ուսումնասիրել: Ի դեպ, մեղադրողները, սա չեն համարում իրենց թերի աշխատանքի արդյունք, այլ որքան էլ զարմանելի է, դատախազ Լևոն Մելքոնյանը մեզ ասաց, թե առաջին ատյանի դատարանը հնարավորություն չի ընձեռել իրենց:

Հիշեցնենք, որ մեղադրողները ամբաստանյալների համար պահանջում էին 12 և 11 տարվա ազատազրկում և ին՞չ կլիներ, եթե առաջին ատյանի դատարանում մեղադրական դատավճիռ կայացվեր ու գործը վերաքննիչում չհայտնվեր, այդ նոր հանգամանքերն էլ ի հայտ չգային, մեր այս հարցը պատասխան չգտավ:

Այսպիսով, Գ Հակոբյանը մեղադրվեց ՀՀ քրեական օրենսգրքի 178(Խարդախությունը), 215(Մաքսանենգությունը), 205(Գանձվող հարկերը, տուրքերը կամ այլ պարտադիր վճարումները վճարելուց խուսափելը). 325(Փաստաթղթեր, դրոշմներ, կնիքներ, ձևաթղթեր, տրանսպորտային միջոցների պետհամարանիշներ կեղծելը, իրացնելը կամ օգտագործելը) հոդվածներով և վերջնական պատիժ նշանակեց 6 տարի ժամկետով: Արամ Ղազարյանը մեղադրվոր ճանաչվեց 215, 205. 325 հոդվածներով, վերջնական պատիժ սահմանվեց 2 տարի ժամկետով: Վճռվեց նրանց տնտեսությունից հօգուտ պետբյուջեի բռնագանձել 455 մլն 717 հզ 900 ՀՀ դրամ որպես հանցագործությամբ պետությանը պատճառած նյութական վնաս: ՖԻԳ ընկերության քաղհայցը բավարարել մասնակիորեն: Գագիկ Հակոբյանից հօգուտ ՖԻԳ-ի, ի դեմս դրա ղեկավար Վաչե Պետրոսյանի բռնագանձել 555հզ 825,5 ԱՄՆ դոլար որպես պատճառված նյութփական վնաս:

Վերաքննիչ դատարանի դատավճիռը, բնականաբար կբողոքարկենք, ասաց ընկերության տնօրեն Արամ Ղազարյանը. «բա սենց դատ են անում, առանց գործը նորմալ ուսումնասիրելու մարդուն 6 տարի տվեցին»-, ասաց Ա. Ղազարյանը նաև հայտնեց, որ բողոքարկելու են բռնագանձման դեմ ևս: