Ձեր վստահելի աղբյուրը

ՀՀ մաքսային պետական կոմիտեի մաքսանենգության դեմ պայքարի վարչությունն օրերս կանխարգելիչ միջոցառումներ է ձեռնարկել, ըստ կոմիտեի լրատվական ծառայության, դրանք արդեն իսկ տվել են անհրաժեշտ արդյունքը: ՄՊԿ մաքսանենգության դեմ պայքարի վարչության 2-րդ բաժնի պետ Էլմեն Ծառուկյանն ասել է, որ միայն անցած մի քանի օրվա ընթացքում արձանագրվել է մաքսային իրավախախտման մոտ 40 դեպք:

Դրանք հայտնաբերվել են ոչ միայն սահմանային մաքսային կետերում, այլև, ստացված օպերատիվ տեղեկությունների հիման վրա, մայրաքաղաքի` առևտրային տարբեր կետերում իրականացված մաքսային հսկողության ժամանակ: Այսպիսով, մաքսային հսողություն է իրականացվել նաև մայրաքաղաքի «Փեթակ», «Սուրմալու» և «Հայկոպ» տոնավաճառներում:

Արդյունքում հայտնաբերվել է առանձնապես խոշոր չափերի սննդամթերք, մասնավորապես ձկան խավիար, ընդեղեն, քաղցրավենիք` այդ թվում շոկոլադե սալիկներ և կոնֆետներ, ինչպես նաև ձեթ, յուղ: ՄՊԿ մաքսանենգության դեմ պայքարի վարչության 2-րդ բաժնի պետ խոսքով, հայտնաբերված սննդամթերքի մի մասը թուրքական արտադրության և առանց որակի համապատասխան սերտիֆիկատի է, մի մասի վերաբերյալ տաղավարի վարձակալները մաքսային ձևակերպման ոչ մի փաստաթուղթ մաքսավորներին չեն ներկայացրել, մի գերակշիռ մասն էլ առանց հայերեն մակնշման սննդամթերք է:

Իսկ ինչպես հայտնի է, հուլիսի մեկից հանրապետություն ներմուծվող և իրացման ենթակա սննդամթերքի անխտիր բոլոր տեսականին ենթակա է պարտադիր հայերեն մակնշման` համաձայն «Սպառողների իրավունքների պաշտպանության մասին» և «Սննդամթերքի անվտանգության մասին» ՀՀ օրենքների, ինչպես նաև «Սննդամթերքի համար պարտադիր հայերեն մակնշման պահանջի կիրառման ժամանակացույցը հաստատելու մասին» կառավարության որոշման:

Էլմեն Ծառուկյանը տեղեկացրել է նաև, որ սահմանային բոլոր կետերում մաքսային պետական կոմիտեի կողմից սահմանված մաքսային ուժեղացված հսկողությունը շարունակվելու է, այնպես որ մաքսային կոմիտեն կրկին նախազգուշացնում է բոլոր ներմուծում իրականացնողներին` խուսափել մաքսանենգ ճանապարհով ապրանքներ տեղափոխելու փորձերից: