Ձեր վստահելի աղբյուրը

«Հաղթողը կլինի Հանրապետական կուսակցությունն իր թեկնածուով, իսկ թե ով կլինի երկրորդ, երրորդ տեղում դեռևս որևէ քաղաքական թիմ որևէ ծրագրային մոտեցում չի ցուցաբերել: Այսօր առավել ակտիվ է Հայ Հեղափոխական Դաշնակցությունը և «Օրինաց երկիր» կուսակցությունը: Մնացածը ցույց կտա ժամանակը, թե ինչ տրամաբանական զարգացումներ կլինեն»,- այսպես պատասխանեց ՀՀԿ փոխնախագահ Գալուստ ՍԱՀԱԿՅԱՆԸ Panorama.am-ի թղթակցի այն հարցին, թե ի՞նչ սցենար կուրվագծվի առաջիկա ընտրություններում և ո՞ր թեկնածուն որ տեղում կհայտնվի:

«Կանխատեսումս հետևյալն է, որ փետրվարի 20-ին մենք կունենանք հանրապետության շատ ուժեղ նախագահ, մեծ առավելություններով, ձայների մեծ թվով, բայց թե ինչպիսին կլինի այլ կուսակցությունների վիճակը, դա իրենց պահվածքից ու քարոզչության ընթացքից է կախված: Պահվածք ոչ թե մեր նկատմամբ, այլ ժողովրդի»,- նշեց նա:

Իսկ ի՞նչ տեղ եք հատկացնում Ձեր կանխատեսումներում առաջին նախագահ Լևոն Տեր-Պետրոսյանին, հարցին պատասխանեց. «Ցավալի է լինելու: Շատ ցավալի վիճակ է ստեղծվելու»:

Ինչ վերաբերում է իշխանությունների ու մասնավորապես նախագահ Ռոբերտ Քոչարյանի կողմից առաջին նախագահ Լևոն Տեր-Պետրոսյանի նկատմամբ վարվող խիստ քարոզչությանը, ՀՀԿ փոխնախագահն ասաց.
«Ընդամենը ասում ենք հետևյալը, որ չի կարելի հայհոյել այն քաղաքական ուժին, որը կարողացել է բարիք բերել այս ժողովրդին: Եթե հայհոյանք լինի, ուրեմն մենք կրկնակի կարող ենք հայհոյել: Ընդամենը դա ենք ասում»:

Արդյո՞ք նման քարոզչությունը նպաստում է նախընտրական շրջանում հանդուրժողականության մթնոլորտի ձևավորմանը, հարցին էլ պատասխանեց. «Համենայն դեպս, մենք տեղիք չենք տալիս, մենք ընդամենը պատասխանում ենք: Եվ չի կարելի անտրամաբանական անհեթեթ մտքեր արտահայտել պետության, իշխող կուսակցությունների ու այն նախագահի հասցեին, որն իր նախագահության օրոք բավականին լուրջ առաջընթաց է ապահովել երկրի համար: Շատ ավելի դրական կլիներ, եթե թացը չորի հետ համեմատության մեջ դրվեր: Դրականն էլ կա, ինչպես մենք ենք արտահայտում, բացասականն էլ, և մենք էլ հենց նրա համար ենք, որպեսզի կարողանանք այդ բացասական երևույթները վերացնել»:

Նրա ներկայացմամբ, «ըստ էության, փորձ է կատարվում, առանց կուսակցական նեցուկի, Լևոն Տեր-Պետրոսյանի մեջ ներկայացնել այն, որ ներկաները լավը չեն, մենք էլ գոնե չարիքի փոքրագույնն ենք: Ներկաները ինչքան էլ վատը լինեն, համենայն դեպս` չարիքի փոքրագույնի դերում հանդես չեն գալիս»: