Ձեր վստահելի աղբյուրը

Համաշխարհային բանկի վարկային ծրագրի շրջանակներում այս տարի Երևան քաղաքում վերապատրաստվել է 344 տեղամասային մանկաբույժ, որոնք ընտանեկան բժշկի որակավորում են ստացել: Վերապատրաստվել է նաև 205 բուժքույր: Այժմ կսկսվի 40-ական բժիշկների և բուժքույրերի վերապատրաստումը: Այս մասին այսօր կայացած ճեպազրույցում ասաց քաղաքապետարանի առողջապահության և սոցիալական ապահովության վարչության պետ Արմեն Սողոյանը:

Նրա խոսքով, ստացիոնար համակարգում համաշխարհային բանկի վարկային ծրագրի շրջանակներում Սուրբ Գրիգոր Լուսավորիչ և Սուրբ Աստվածամայր բժշկական կենտրոններում իրականացվում է լուրջ ներդրումային ծրագիր: Վերջինիս տեղեկացմամբ, այդ ծրագրի շրջանակներում երկու կենտորններում էլ շինարակական աշխատանքները գրեթե ավարտվել են: Երկու հաստատություններն էլ ստացել են ժամանակակից նոր բժշկական սարքավորումներ: Ծրագրի շրջանակներում Սուրբ Գրիգոր Լուսավորիչ բժշկական կենտրոնում իրականացվել է 120 մլն դրամի շիանարարարական շախատանքներ և 72 մլն դրամի կաթսայատան վերանորոգման աշխատանքներ: Ներդրվել է 545 մլն դրամի բժշկական ժամանակակից սարքավորումներ:

Ա. Սողոյանի հաղորդած տվյալների համաձայն, Սուրբ Աստվածամայր բժշկական կենտրոնում իրականացվել է 120 հազար դոլարի շինարարական աշխատանքներ և ներդրվել է 1.9 մլն դոլարի արժողության սարքավորումներ: Վարչության պետի խոսքով, Քանաքեռ-Զեյթուն բժշկական կենտրոնում, որը չի ընդգրկվել համաշխարհային բանկի վարկային ծրագրում, ներդրումներ է արել քաղաքապետարանը. վերանորոգվել են վիրաբուժության և ուռուցքաբանության բաժանմունքները: Այս տարի ավարտվել են նաև Սարի թաղի պոլիկլինիկայի վերանորոգման աշխատանքները, որի համար անհրաժեշտ միջոցները հատկացրել է կառավարությունը:

Ա. Սողոյանի հավաստմամբ, այս տարի Բեռլին և Նիցա կատարած այցելության ժամանակ տեղի հիվանդանոցային ցանցի ղեկավարության հետ հիվանդների և կադրերի փոխանակման, ինչպես նաև նոր սարքավորումների ձեռք բերման հարցերի շուրջ պայմանավորվածություն է ձեռք բերվել: