Ձեր վստահելի աղբյուրը

«Հազարամյակի մարտահրավեր» ծրագրի իրականացումը մեր երկրի համար կարևորվում է առնվազն 4 հանգամանքով: Նախօրեին «Հազարմայակի մարտահրավեր» հիմնադրամ-Հայաստան» ՊՈԱԿ-ի կառավարման խորհրդի` այս տարվա վերջին նիստում նման տեսակետ է հայտնել վարչապետ Սերժ Սարգսյանը, ով վարել է նիստը:

Ըստ Ս. Սարգսյանի, առաջինն այն է, որ ծրագրով Հայաստանին հատկացված ավելի քան 235 մլն ԱՄՆ դոլարը բավականին լուրջ գումար է մեր տնտեսության համար և զուտ որպես ներդրում` իր էական ազդեցությունը կունենա երկրի զարգացման գործում: Երկրորդ` այս ծրագրով լուծվում են ճանապարհաշինության և ոռոգման, գյուղական զարգացման խնդիրներ, այսինքն` այն ամբողջովին համահունչ է մեր պետության տարածքների համաչափ զարգացման քաղաքականությանը: Վարչապետը նշել է, որ ծրագրի իրականացումը ոչ միայն տնտեսական խնդիր է, այլ նաև ունի քաղաքական և վարկանիշային կողմ: Նա պարզաբանել է, որ «Հազարամյակի մարտահրավեր» ծրագրից չեն կարող օգտվել սոսկ ցանկացողները, այլ զարգացման որոշակի մակարդակ ունեցող երկրները, ուստի Հայաստանի ընդգրկվածությունը ծրագրում խոսում է այն մասին, որ մեր երկիրը զարգանում է արդի պահանջներին համահունչ: Եվ չորրորդ` ծրագիրը հնարավորություն է տալիս Հայաստան ներմուծելու աշխատանքային նոր մշակույթ:

Ինչպես հատնեցին կառավարության տեղեկատվության և հասարակայնության հետ կապերի վարչությունից, ամփոփելով անցած մեկ տարում ծրագրի իրականացման արդյունքները, Ս. Սարգսյանը նշել է, որ մեր երկրին հաջողվել է ավարտել նախնական-նախապատրաստական աշխատանքների փուլը, որից հետո սկսել ճանապարհաշինական որոշակի աշխատանքների իրականացումը: Հաջորդ կարևոր հանգամանքն այն է, որ տեսանելի են դառնում ՀՄԿ-ի հետ մեր երկրի համագործակցության ուղիները նաև ապագայում. վերջերս կորպորացիան հաստատել է 2008թ.-ի համար ծրագրին Հայաստանի մասնակցության հարցը:

Ս. Սարգսյանը նշել է, որ մեկամյա աշխատանքի արդյունքում այսօր մեր երկիրը պատրաստ է նաև դիմակայելու նոր մարտահրավերների: Ըստ նրա, բնական է, որ այսուհետ Հայաստանի տնտեսության նկատմամբ պահանջները փոքր-ինչ այլ են լինելու, չափանիշները փոխվելու են, քանի որ միջազգային ֆինանսական կազմակերպությունները մեր երկիրն արդեն դասում են ոչ թե ցածր, այլ միջին կայուն եկամուտներ ունեցող երկրների շարքը: Ուստի, վարչապետը հորդորել է առաջիկայում ավելի ակտիվորեն աշխատել, նշելով նաև, որ բավականին լավատես է ապագա արդյունքների հարցում, մանավանդ որ, ըստ նրա, տնտեսությունը զարգանում է և բարեփոխումները նորմալ են ընթանում:

Անցնելով օրակարգի հարցերին, կառավարման խորհուրդը քննարկել և հաստատել է «Հազարամյակի մարտահրավեր» կորպորացիային (ՀՄԿ) ներկայացվելիք վեցերորդ հատկացման հայտի և կից փաստաթղթերի փաթեթը: Հատկացումների վեցերորդ հայտով ՀՄՀ-Հայաստան ՊՈԱԿ-ը նախատեսում է գալիք եռամսյակի համար ՀՄԿ-ից ստանալ 5 մլն 344 հազար 873 ԱՄՆ դոլար, այդ թվում` 2008թ. հունվարին` 42 հազար 872, փետրվարին` 3 մլն 920 հազար 903 և մարտին` 1 մլն 381 հազար 98 ԱՄՆ դոլար: Ըստ ներկայացվող ֆինանսական հաշվետվության, եկող եռամսյակի ընթացքում փաստացի կանխատեսվող ծախսը կազմում է 6 մլն 383 հազար 811 ԱՄՆ դոլար: Ընթացիկ եռամսյակի վերջի դրությամբ, ծրագրի փաստացի և կանխատեսվող (դեկտեմբեր ամսվա) ծախսերի ընդհանուր գումարը կազմում է 9 մլն 495 հազար 369 ԱՄՆ դոլար: