Ձեր վստահելի աղբյուրը

«Հայ-թուրքական հարաբերությունների ներկա վիճակը թաքնված է Թուրքիայի կողմից նախապայմաններ առաջադրելու մեջ»,- այսօր այդ խնդրի վերաբերյալ խորհրդարանական լսումների ժամանակ նշեց ԱԺ պաշտպանության, ԱԱ և ՆԳ մշտական հանձնաժողովի նախագահ Արմեն ՌՈՒՍՏԱՄՅԱՆԸ, դա համարելով ոչ քաղաքակիրթ մոտեցում: Նրա ներկայացմամբ, Թուրքիայի կողմից առաջ քաշված բոլոր նախապայմանները անօրինական են և ունեն հետին նպատակ: Մասնավորապես Ցեղասպանության խնդրի արծարծումից հրաժարվելու պահանջով Թուրքիան ցանկանում է հայոց ցեղասպանության ճանաչման «թափ հավաքող գործընթացը կասեցնելու գործում» Հայաստանին ունենալ որպես գործընկեր:

Ըստ Ա. Ռուստամյանի, այսօր Թուրքիայի քաղաքականության հիմքում շարունակում է մնալ պանթուրքիզմի գաղափարախոսությունը, որը «նոր վերածնունդ է ապրում և Թուրքիայի, այսպես կոչված, բազմավեկտոր քաղաքականության մեջ ավելի ու ավելի է զգացվում պանթուրքիզմի շունչը»:

Անդրադառնալով ԼՂ հակամարտության գոտուց հայկական զորքերը դուրս բերելու Թուրքիայի պահանջին, նա նշեց, որ «ժամանակակից աշխարհում ընդունված չէ երկու երկրների միջև հարաբերությունները պայմանավորել երրորդ երկրով» և հենց նման պահանջը բացահայտում է, որ Թուրքիան ոչ այնքան Հայաստանի հետ պատշաճ հարաբերություններ չհաստատած հարևան երկիր է, որքան պաշտոնապես չհայտարարված հակամարտության իրական կողմ:

Ինչ վերաբերում է Թուրքիայի ԵՄ անդամակցությանը, ԱԺ հանձնաժողովի նախագահը նշեց, որ այն ձեռնտու է Հայաստանի համար, «եթե միայն ժողովրդավարական երկիր դառնալը Թուրքիայի համար անկեղծ նպատակ է, այլ ոչ լոկ միջոց նոր թափ հաղորդելու իր պանթուրքիստական նկրտումներին»:

«Միայն ժողովրդավարական Թուրքիան կարող է հրաժարվել վերջնագրային բնույթ ունեցող նախապայմաններից, և ճանաչելով հայոց ցեղասպանությունը, տարանջատվել Օսմանյան կայսրությունից, ինչպես նաև պահպանելով դրական չեզոքություն ԼՂ խնդրում, ստանձնել իրական խաղաղարար դերակատարություն»,- իր խոսքն ամփոփեց նա: