Ձեր վստահելի աղբյուրը

Իրանի և Հայաստանի կառավարությունների նախաձեռնությամբ ստեղծվել են աշխատանքային խմբեր` Արաքս գետի աղտոտվածության ուսումնասիրման համար: Ինչպես այսօր լրագրողների հետ հանդիպման ժամանակ հայտնեց բնապահպանության նախարար Արամ Հարությունանը, այդ ծրագրի շրջանակում երկու երկրներում անց է կացվել աշխատանքային 7 հանդիպում, որոնց ընթացքում հստակեցվել են գետի ջրից համատեղ և միաժամանակյա նմուշառման կետերը, անալիզների կատարման մեթոդաբանությունը և ստացված տվյալների վերլուծության գործընթացը:

Նրա խոսքով, Սևանա լճում էնդեմիկ ձկնատեսակներից` գեղարքունի և ամառային իշխանի, ինչպես նաև կողակի պոպուլյացիայի համալրման գծով 2007թ. պետական պատվերի ծավալները ընդլայնվել են 20 միլիոն դրամով և կազմել 30 մլն դրամ: 2007թ. ապրիլին Սևանա լիճ է բացթողնվել 84000 հատ 4 գրամից ավել և 15200 հատ /40 գրամից ավել/ մանրաձուկ 20 մլն. դրամի չափով: Մնացած գումարով իշխանի մանրաձկան /1.5 գրամից ավել/ բացթողումը իրականացվել է նոյեմբեր ամսվա ընթացքում` 59.400 հատ գեղարքունի իշխան և 15.500 հատ ամառային իշխան: Հրապարակած տվյալներով, այսօրվա դրությամբ տրվել են արդյունագործական ձկնորսության 11 լիցենզիա և կնքվել են 6 պայմանագրեր, սիրողական որսի 17 կտրոններ և կնքվել են 17 պայմանագրեր, արտահանման և ներմուծման 515 թույլտվություն:

Ինչ վերաբերում է բնապահպանական խախտումներին, ապա 1802 տնտեսվարող սուբյեկտներում իրականացրած ստուգումների արդյունքում արձանագրվել է բնապահպանական օրենսդրության պահանջների 1682 խախտում: Տեսչության կիրառած պատժամիջոցներից պետբյուջե մուտքագրվել է` 93.4 մլն.դրամ:

Երևանում ավտոտրանսպորտային միջոցներից արտանետվող վնասակար նյութերի չափման կետերում կատարվել է ուսումնասիրություն, որի արդյունքում պարզվել է, որ լիցենզիա ունեցող 5 կազմակերպություններից միայն 3-ն են իրենց գործունեությունն իրականացնում լիցենզիայում նշված վայրերում:

Կենդանական աշխարհի պահպանության ոլորտում հայտնաբերվել է 90 խախտում, կազմվել է վնասի հատուցման 38 արձանագրություն` 6.76 մլն. դրամի չափով:  Առգրավվել է 425 հատ ձկնորսական ցանց, 195 հատ խեցգետնաորսիչ, 4 լողամիջոց, 7 հատ որսորդական հրացան, 1 ինքնաձիգ, 922 կգ ձուկ, 50կգ որսամիս:

Տեսչության Սյունիքի տարածքային բաժնի կողմից հայտնաբերված է Կարմիր գրքում ներառված 1 բեզոարյան այծի, 2 այծյամի որսագողության դեպք, որի համար բնությանը հասցված վնասի հաշվարկված գումարը կազմել է 6.25մլն. դրամ: Որսը և որսագողության պարագա հրացանը առգրավվել են, դեպքի առնչությամբ հարուցվել է քրեական գործ, որը արդեն դատական կարգով բավարարվել է:

Բուսական աշխարհի պահպանության ոլորտում իրականացրած ամենօրյա շրջայցերի և անտառտնտեսություններում կատարված մասնակի ստուգումների արդյունքում հայտնաբերվել է 313 խախտում: Նախարարի տվյալներով, նախօրեի դրությամբ Հայաստան է ներմուծվել 950 հատ փշատերև ծառ, որից 50 հատ Գերմանիայից, 350 հատ Հոլանդիայից և 550 հատ Ռոստով քաղաքից (ՌԴՀ): ՀՀ անտառային ֆոնդից ապօրինի հատված փշատերև ծառատեսակների վաճառքի դեպքեր չեն հայտնաբերվել: