Ձեր վստահելի աղբյուրը

«Լ.ՏերՊետրոսյանի կողմից  ոստիկանության դեմ հրապարակած «փաստերը» ծայրեծայր շինծու են»,-նման հայտարարությամբ հանդես է եկել ՀՀ ոստիկանությունը: Հայտարարության մեջ հերքվում է նախկին նախագահի, մասնավորապես այն հայտարարությունը, թե իբր իր «հազարավոր համակիրներ» հանրահավաքներին մասնակցելու համար, կանչվել են ոստիկանություն ու ենթարկվել ճնշումների: ՀՀ ոստիկանությունում նենգափոխում են համարում Տեր-Պետրոսյանի այն հայտարարությունը, թե «անցած ամիսներին իշխանությունները բանտերից վաղաժամկետ ազատել ե բազմաթիվ մեղադրյալների ու դատապարտյալների, որոնք այդ շնորհը  պիտի հատուցեն առաջիկա ընտրությունների ընթացքում մատուցելիք համապատասխան ծառայություններով»:

«Տեր-Պետրոսյանը խոսում է «ՍԻԼ-Գրուպ» ընկերության եւ «ԳԱԼԱ» հեռուստակայանի դեմ «սանձազերծված հարկային տեռորի ու դատական քաշքշուկի» մասին,-նշել են հայտարարության մեջ և ավելացրել, որ  եթե հավատայինք, որ նա իսկապես ցավում է գործարարության արդյունավետության եւ լրատվամիջոցների ազատության համար, կառաջարկեինք ճշտել հիշյալ ընկերությունն ու հեռուստակայանը իրենց գործունեության ընթացքում քանի միլիոն չեն վճարել որպես հարկ ու ծառայությունների վարձ»:

Ոստիկանության հայտարարաության մեջ ասված է նաև, որ «ՍԻԼ-Գրուպ» ընկերության արտադրանքի հետ կապված զեղծարարությունների եւ եկամուտները թաքցնելու իրողություններն արդեն իսկ հայտնի են մեր քաղաքացիներին, իսկ ինչ վերաբերում է «ԳԱԼԱ»-ին, ապա ոստիկանությունից հայտնում են, որ «ԳԱԼԱ»-ն իրականում ոչ միայն հեռուստակայան է, այլեւ բենգալյան կրակներ արտադրող, որը եկամուտներից ոչ մի լումա հարկ չի վճարել: «Սա է իրականությունը, որը բացառապես տնտեսական գործունեության դաշտում է եւ ոչ մի կապ չունի քաղաքականության ու նախընտրական նախասիրությունների հետ»,-հավատացնում են իրավապահները:

Ի վերջո, ամփոփելով հերքումների ու մերժումների շարքը, ոստիկանության հայտարարության մեջ ասվում է. «Եթե հավատայինք Տեր-Պետրոսյանի անկեղծ մտահոգությանն ու սրտացավությանը, իրոք, կառաջարկեինք առաջնորդվել միայն ստուգված փաստերով ու տեղեկատվությամբ, բայց չենք հավատում, որովհետեւ կեղծիքի ու նենգափոխման մեկ դեպքը կարող է սխալմունք կամ թյուրիմացություն լինել, ծայրահեղ դեպքում`երկուսը, երեքը. ավելին արդեն օրինաչափություն է, գաղափարախոսական գիծ, մարտավարություն: Վտանգավոր մարտավարություն: Վտանգավոր` մեր ժողովրդի ու երկրի, մեր պետականության համար, որովհետեւ այս կերպ տրոհվում է հասարակությունը, մարդկանց մեջ անվստահություն է սերմանվում պետական ինստիտուտների հանդեպ, կասկածի դաշտ ենք ներքաշվում բոլորս»:

Վտանգավոր են համարում նաև իրավապահ մարմիններին, մասնավորապես`ոստիկանությանը, քաղաքական խաղերի մեջ ներքաշելու նախկին նախագահի ջանքերը: Հայաստանի Հանրապետության ոստիկանությունը միանշանակ ապաքաղաքական կառույց է, որը գործում է բացառապես ՀՀ Սահմանադրությամբ եւ օրենքներով իրեն վերապահված լիազորությունների շրջանակներում, պահպանելով օրենքի ոչ միայն ոգին, այլեւ տառը, հավատարիմ մնալով հասարակակական կարգի պահպանման եւ քաղաքացիների պաշտպանության` իր գերխնդրի անվերապահ իրականացմանը: