Ձեր վստահելի աղբյուրը

Բրիտանական Լիվերպուլ քաղաքը պաշտոնապես դարձել է Եվրոպայի 2008թ. մշակութային մայրաքաղաքը: Հայտարարված մրցույթին մասնակցել են նաև բրիտանական այլ քաղաքներ` Բրիստոլ, Բիրմինգեմ, Կարդիֆ, Նյուկասլ, Օքսֆորդ:
Լիվերպուլն ընտրվել է 2008թ. մշակութային մայրաքաղաք դեռևս 2003թ., որը Մեծ Բրիտանիայի քաղաքների շարքում իր հանրահայտությամբ վեցերորդն է` առաջ անցնելով Բատ, Օքսֆորդ, Քեմբրիջ, Յորք քաղաքներից:

Եվրոպայի մշակութային մայրաքաղաք ընտրվելու կապակցությամբ միջոցառումները կսկսվեն այսօրվանից` Լիվերպուլի կենտրոնական հրապարակում` բաց երկնքի տակ, տեղի կունենա անկրկնելի շոու-ծրագիր:
Հունվարի 12-ին Լիվերպուլի հաղթանակին նվիրված միջոցառումներն ավելի բուռն շարունակություն կունենան: Կկազմակերպվի համերգ-մյուզիքլ վերջերս կառուցված համերգային համալիրում: Կազմակերպիչների խոսքով, այդ երեկոն շատերը կհիշեն: Երեկոյի ընթացքում կցուցադրվի ամենաանսովոր ներկայացումը, որին կմասնակցեն տարբեր երկրներից հրավիրված հյուրեր, երգիչներ, բանաստեղծներ, ակրոբատներ, նավաստիներ, այգեպաներ:

Հունվարի 13-ին կբացվեն բազմաթիվ թանգարաններ, մշակութային կենտրոններ: Լիվերպուլյան «Տատա» պատկերասրահում ցուցադրվելու են հայտնի արվեստագետներ Պաբլո Պիկասոյի, Ռոդենի, Էնդի Ուորխոլի գլուխգործոցները: Նշենք, որ Լիվերպուլն արդեն աշխարհում համարվում է երաժշտության, սպորտի, արվեստի կենտրոն: Լիվերպուլն ամենից ավելի արագն է զարգանում որպես զբոսաշրջային և մշակութային կենտրոն: