Ձեր վստահելի աղբյուրը

Արոնյան-Մագնուս Կարլսեն դիմակայությունը «Կորուս Չեսս 2008»-ի 4-րդ փուլում ավատվել է խաղաղ արդյունքով: Այսպիսով, մրցաշարի միանձնյա առաջատար այս փուլից հետո կրկին չորոշվեց: Հայ գրոսմայստեր, օլիմպիական չեմպիոն Արոնյանը իր հաշվում ունի 3 միավոր և նորվեգացի Կարլսենի հետ գլխավորում է մրցաշարային աղյուսակը: 4-րդ փուլի յոթ մրցավեճերից միայն երեքում է գրանցվել արդյունավետ ելք:

Աշխարհի չեմպիոն ռուսաստանցի Վլադիմիր Կրամնիկը առավելության է հասել Էլյանովի նկատմամբ, Վան Վելին հաղթել է Տոպալովին, իսկ Պոլգարը` Գելֆանդին: Մրցաշարային աղյուսակի երրորդ հորիզոնականում գտնվող ադրբեջանցի Թեյմուր Ռաջաբովը ոչ ոքի խաղալով իր հայրենակից Շահրիյար Մամեդյարովի հետ զիջել է միանձյա այդ դիրքում լինելու հնարավորությունը: 2.5-ական միավոր ունեն նաև Կրամնիկը և Վելլին: Աշխարհի գավաթակիր Վիշվանաթ Անանդը կրկին ոչ ոքի է խաղացել Ադամսի հետ և գտնվում է 10-րդ հորիզոնականում: 5-րդ փուլում հնդիկ շախմատիստը իր ուժերը կչափի «Կորուս Չեսս 2008»-ի գործող չեմպիոն հայ գրոսմայստեր Լևոն Արոնյանի հետ:

«Բ» խմբում Գաբրիել Սարգսյանը 1.5 միավորով գտնվում է 10-րդ հորիզոնականում, իսկ Սլովակիայի դրոշի ներքո հանդես եկող հայ գրոսմայստեր Սերգեյ Մովսիսյանը 2.5 միավորով նախորդում է մրցաշարի առաջատարներին Հարիկրիշնային, Բակրոյին և Սմիթսին, որոնք իրենց հաշվում ունեն 3-ական միավոր:

Հիշեցնենք, որ Լ. Արոնյանն «Կորուս Չեսս 2008» շախմատի աշխարհի ուժեղագույնների սուպերառաջնության գործող չեմպիոնն է: Նա միակն էր, որ ողջ մրցապայքարի ընթացքում ոչ մի պարտություն չկրեց: Նրան հաջորդում էին ադրբեջանցի Ռաջաբովը, Բուլղարիան ներկայացնող Տոպալովը և շախմատի աշխարհի չեմպիոն ռուսաստանցի Կրամնիկը: Նշենք, որ մրցաշարի մասնակիցներից ամենաշատը` 5 անգամ, չեմպիոնի կոչումը նվաճել է հնդիկ շախմատիստ Վիշվանաթան Անանդը, Տոպալովը` 2, Գելֆանդը, Արոնյանը և Կրամնիկը 1-ական անգամ:

«Կորուս Չեսս» առաջնությունն անընդմեջ անցկացվել է 1938 թվականից, սակայն այն մինչև 2002 թվականը կոչվել է «Հոգովենտուր»: Այս մրցաշարին մասնակցում են աշխարհի ամենաբարձր վարկանիշ ունեցող շախմատսիտները: «Կորուս Չեսս 2008»-ը մեկնարկել է հունվարի 12-ին և կշարունակվի մինչ այս ամսվա 27-ը: Այն անցկացվում է Հոլանդիայի Վեյկ-ան-Զեե քաղաքում: