Ձեր վստահելի աղբյուրը

«Կորուս Չեսս-2008» շախմատի ամենաբարձր վարկանիշ ունեցող շախմատիստների սուպերառաջնության 6-րդ տուրից հետո մրցաշարային աղյուսակը միանձնյա գլխավորում է նորվեգացի Մագնուս Կարլսենը: Նա այս փուլում հաղթեց Փոլգարին և իր հաշվում ունի 4,5 միավոր:

Վեցերորդ փուլը հաջող չէր հայ գրոսմայստեր, օլիմպիական չեմպիոն Լևոն Արոնյանի համար: Մեր շախմատիստն այս առաջնությունում առաջին անգամ պարտություն կրեց աշխարհի չեմպիոն ռուսաստանցի Վլադիմիր Կրամնիկի հետ խաղում, ինչի հետևանքով հայտնվեց մրցաշարային աղյուսակի 4-րդ հորիզոնականում: Արոնյանն իր հաշվում այժ ունի 3.5 միավոր:

Այսպիսով, առաջին հորիզոնականը զբաղեցնում է Կարլսենը, երկրորդ և երրորդ հորիզոնականները 4-ական միավորով զբաղեցնում են Կրամնիկը և Ռաջաբովը, ով այս փուլում առավելության հասավ աշխարհի գավաթակիր, հնդիկ Վիշվանաթ Անանդի նկատմամբ:
Նշենք, որ այս տուրում 7 խաղերից միայն երեքն են ավարտվել արդյունավետ ելքով: «Կորուս Չեսս 2008»-ի 7-րդ փուլում Արոնյանի իր ուժերը կչափի ադրբեջացի Ռաջաբովի հետ, Կարլսենը կհանդիպի բուլղարացի Տոպալովին, իսկ Կրամնիկը կմրցի Ուկրաինան ներկայացնող Իվանչուկի հետ:

Ամփոփելով ուժեղագունների մրցապայքարի առաջին կեսը, նշենք, որ Արոնյանը իր ակտիվում ունի երկու հաղթանակ, երեք ոչ ոքի և մեկ պարտություն: Կարլսենը, որի հետ մեր շախմատիստը մինչև վերջին փուլը գլխավորում էր մրցաշարային աղյուսակը, 3-ական հաղթանակ և ոչ ոքի է գրանցել: Աշխարհի չեմպիոն Կրամնիկը 6 խաղերի արդյունքում գրանցել է երկու հաղթանակ և 4 խաղաղ արդյունք, նույն ցուցանիշներն ունի նաև ադրբեջանցի Ռաջաբովը: Նշենք, որ Անանդը թեև զբաղեցնում է ՖԻԴԵ-ի վարկանշային ցուցակի առաջին հորիզոնականը ուժեղագույնների այս մրցաշարում չի հաջողում: Նա իր ակտիվում ունի 4 ոչ ոքի և մեկ պարտություն:
«Բ» խմբում հայ գրոսմայստեր Գաբրիել Սարգսյանը 2 միավորով 13-րդ հորիզոնականում է, իսկ Սլովակիայի դրոշի ներքո հանդես եկող հայազգի Սերգեյ Մովսիսյանը 4 միավորով կիսում է 2-րդ տեղը: Բ խմբի մրցաշարային աղյուսակը 4.5 միավորով գլխավորում է Բակրոն:
Հիշեցնենք, որ Լ. Արոնյանն «Կորուս Չեսս 2008» շախմատի աշխարհի ուժեղագույնների սուպերառաջնության գործող չեմպիոնն է: