Ձեր վստահելի աղբյուրը

«Կորուս Չեսս-2008»-ի 8-րդ փուլից հետո հայ գրոսմայստեր, օլիմպիական չեմպիոն Լևոն Արոնյանը մրցաշարային աղյուսակի 2-րդ հորիզոնականում է: Մեր շախմատիստը 8-րդ փուլում ոչ ոքի է խաղացել ադրբեջանցի Շահրիյան Մամեդյարովի հետ` վաստակելով կես միավոր: Հիշեցնենք, որ 7-րդ փուլում հայ գրոսմայստերը պարտության մատնեց մեկ այլ ադրբեջանցու` Թեյմուր Ռաջաբովին, ով վարկանիշով ավելի բարձր է իր հայրենակցից:

Այս տուրից հետո Արոնյանն իր հաշվում ունի 5 միավոր և աշխարհի չեմպիոն ռուսաստանցի Վլադիմիր Կրամնիկի հետ կիսում է երկրորդ հորիզոնականը: Առաջնության միանձնյա առաջատարը Նորվեգիան ներկայացնող 17-ամյա Մագնուս Կարլսենն է: Նա 8-րդ փուլում ոչ ոքի է խաղացել իսրայելցի Բորիս Գելֆանդի հետ: Այս տուրից հետո համեմատաբար իր դիքերը բարելավել է աշխարհի գավաթակիր, հնդիկ Վիշվանաթ Անանդը, ով հաղթելով Բուլղարիան ներկայացնող Վեսելին Տոպալովին 4.5 միավորով հայտնվել է 4-5-րդ տեղում: Նույնքան միավոր ունի Ռաջաբովը:

Նշենք, որ 8-րդ տուրի 7 խաղերից միայն Անանդ-Վեսելին մրցազույգի խաղն է ավարտվել արդյունավետ ելքով: 9-րդ փուլում Լևոն Արոնյանի մրցակիցն է ուժեղագույնների սուպերառաջնության նորեկ Էլյանովը, ով 2.5 միավորով Գելֆանդի հետ ետնապահների շարքում է:

«Բ» խմբում 8-րդ փուլից հետո Սլովակիայի դրոշի ներքո հանդես եկող հայ գրոսմայստեր Սերգեյ Մովսիսյանը Բակրոյի հետ գլխավորում է մրցաշարային աղյուսակը: Նրանք իրենց հաշվում ունեն 5-ական միավոր: Գաբրիել Սարգսյանի խաղը չի ստացվում. նա 2.5 միավորով 13-րդ հորիզոնականում է: Հիշեցնենք, որ Լ. Արոնյանը «Կորուս Չեսս-2007» շախմատի աշխարհի ուժեղագույնների սուպերառաջնության գործող չեմպիոնն է: Մրցաշարը մեկնարկել է հունվարի 7-ին և կշարունակվի մինչ այս ամսվա 27-ը: