Ձեր վստահելի աղբյուրը

Այս տարի մինչև փետրվարի սկիզբը կավարտվի հանրապետության խոշոր վեց մայր ջրանցքների վերանորոգման աշխատանքների մշակման փուլը: Այս մասին Panorama.am-ի թղթակցի հետ զրույցում ասաց «Հայջրնախագիծ» ինստիտուտի գլխավոր ճարտարագետի տեղակալ Ալեքսանդր Թարվերդյանը:

Նրա խոսքով, հանրապետության ոռոգման մայր համակարգերի վնասված տեղամասերում իրականացվում են շինարարական ու գիտահետազոտական աշխատանքներ: Այժմ վերակառուցողական աշխատանքներ են իրականացվում Շիրակի, Ստորին Հրազդանի, Արմավիրի, Արզնի-Շամիրամի, Արտաշատի ու Թալինի մայր ջրանցքներներում՝ ներառյալ իրենց 23 երկրորդական ջրանցքները:

«Ավարտել ենք ջրանցքների տեխնիկական վիճակի ուսումնասիրությունը, կատարել ենք երկրաբանական, տոպոգրաֆիական ու ջրաչափական հանույթներ, ստուգել ենք ջրային կորուստների չափանիշները»,-ասաց Ա. Թարվերդյանը: Բացի այդ աշխատանքներից, մասնագետը կարևորեց նաև այն, որ արդեն կատարվել են արհեստական, հիդրոտեխնիկական կառուցվածքների տեխնիկական վիճակի ստուգումները, ինչն էլ, ըստ նրա թույլ տվեց անցում կատարել վերլուծական, վերամշակման, նախագծային ու նախահաշվարկման աշխատանքներին:

«Այժմ, մենք ամենակարևոր փուլում ենք գտնվում, քանի որ հաշվարկման ու մշակման ժամանակ յուրաքանչյուր սխալ կարող է զրոյի հավասարեցնել ողջ աշխատանքը»,-նշեց մասնագետը: Ա. Թարվերդյանի խոսքով, կազմակերպությունը մինչև փետրվարի սկիզբը պետք է ավարտի ու ներկայացնի աշխատանքների այս փուլի արդյունքը:
Նշենք, որ ծրագիրն իրականացվում է «Հազարամյակների մարտահրավերներ» ծրագրի շրջանակում: Աշխատանքները, ըստ նախատեսվածի, պետք է ավարտվեն մինչև 2009 թվականը: